"Самур" - 20  |  12(247) 2011      

Вири лезгийрин газет тир «Самур» рикI алаз къачур, кIелай, теблигъ авур, ам ара датIана акъудун патал зегьметар чIугур, шумудни са инсанрив кхьиз тур дустар тIимил авач чахъ. Абурун кьула Бегьрам Залова генани лайихлу чка кьаз-ва. Авайвал лагьайтIа, ихьтин кьегьал ксар хьаначиртIа, чавай газет галай-галайвал акъудиз жечир. 20 йисан къене чи даяхни арха хьайи и къени, умун къилихрин инсан «Самурдин» Худат шегьердин мухбиррин постунин кьил я.
Дерин дуьньякьатIунар авай, чина даим мили хъвер къугъваз-вай Бегьрам Залов гзафбуруз чирвилерихъ, лезгийрин тарихдихъ, медениятдихъ ялдай, дидед чIалалди дамахдай инсан хьиз чида. Дегиш тежер къилихрин инсан я ам. Хачмаз райондин лезгийрин кьула ара датIана «Самур» теблигъ ийизвай ада ина яшамиш жезвай чи къелемэглийрин шиирарни гьикаяяр кIватIна газетдин чинриз акъудун патални гзаф алахъунар ийизва. Гьа ихьтин крариз килигна, чавай Бегьрам Залов «Самур» газетдин тарихда гьатнава лугьуз жеда.
ЧIехи тарцихъ чIехи дувулар жеда лугьуда бубайри. Заловар КцIар райондин Кичан хуьруьн чIехи сихилрикай я. И сихилдин са бязи векилри гьеле XIX асирда кIел-кхьиниз майилвал къалурнай. Абур Урусатдин чара-чара шегьерра чирвилер къачуна пешекарар хьиз ватандиз хтанай.
Яргъал йисара хайи Кичанрин хуьре, ТIигьиржалдал, Хьиле ва Девечидин са жерге хуьрера муаллимвал авур Мурадхан Залован тIвар къедалди гзафбуру гьуьрметдалди кьада. Адан михьи тIварцIи, хъсан амалри Мурадхан муаллимдин 9 веледдин уьмуьрдин рекьеризни нур хъичирна. Халкьдин аялрин рикIера чирвилерин экв куькIуьрай и касди вичин вири веледрив институтра кIелиз туна. Бабека, Бегьрама, Гьакъикъата ва Эслиди Азербай-жандин Политехник Институт, Зала Азербайжандин Гьукумат-дин Университет, Назлуди Азер-байжандин НафтIадин Академия, Низамиди Санкт-Петер-бургдин Тамарин Майишат-дин Академия, Разияди АПИ, Шагьисмаила Москва-дин Санаидин Институт   акьалтIарна.
Бегьрамани вичин уьмуьрдин юлдаш Мирваридихъ галаз санал веледрив институтра кIелиз туна. Демир юрист, Вуькъар экономист я. Лауради Астрахандин Медицинадин Институтдин IV курсуна кIелзава.
Эцигунрин инженер тир Бегьрам зегьметдал рикI алай кас я. Са шумуд йисуз ада бригадирвал, прорабвал, парткомвал авуна, Набрандин хуьруьн советдиз регьбервал гана. Алай вахтунда ам Хачмаз райондин Худат поселкадин беледиядик ква.
Вичин хизандин, мукьва-кьилийрин, ярар-дустарин, элдин патай чIехи гьуьрмет къазанмишнавай Бегьрам Залован 60 йис тамам хьанва лагьай хабарди чун шадарна. И кьегьал инсан тебрик авун патал адан кьилив гзаф хайибур, ярар-дустар кIватI хьанвай. Абуру юбилярдиз чпин рикIин гафар лагьанай, адаз агалкьунар, чандин сагъвал тIалабнай.
Багърийри хьиз чнани Бегьрам Заловаз инлай кьулухъни гьакъи-сагъвилелди, тIал-квал тийижиз уьмуьр гьалун, хъсан инсанрал дуьшуьш хьун, хтулар, штулар чIехи авуна абурун мехъеррин кьиле хьун тIалабзава. Аваз хьурай ихьтин къени инсанар!

«Самур» газетдин коллектив