Барка  |  4(263) 2013      

      Яран сувар алатнаватIани, адан чи гьиссериз кужумнавай хвешивилер гьелени алатнавач. Суварин вахтунда Баку-да тухвай «Лезгийрин гатфарин шадвилер» тIвар алай ял ягъидай мярекатди яран хвешивилер генани артухарна. Чи сейли «Сувар» ансамблдин веледдин - «Жиги-тар» кьуьлерунин коллективдин 7 йисан юбилейдиз талукьарнавай няниди иниз атанвайбуруз шадвилин гьиссер багъишна. Милли пекер алаз сегьнедиз экъечIай са буйдин иер жегьилри - Завир Нежефова, Сакин Велиметова, Анар Бутаева, Турал Самедова, Магьмуд Багъышова, Рауф Гьейдарова ва Бейлер Дадашова «Лезгинкадал» илигайла инсанри чпин разивал гурлу капаралди малумарна.
        Чи кьуьлунин сенят вини дережадив агакьарун патал датIана зегьмет чIугвазвай и жегьилри эхиримжи йисара Бакудин медениятдин уьмуьрдиз лезги руьгь гъанвайди шаксуз я. Гьавиляй абур барка ийиз Самур Лезги Милли Меркездин кьиле авайбур, «Сувар», «Къайи булах», «Шагьнабат» хьтин коллективар атанвай. Жавагьир Абдуловади, Заур Мусаева, Руслан Пирвер-диева, Нуьвиддин Жигерова, Арзумана коллектив музыкадин нумрайралди барка авуна. Кьуьлерин «Лезгинка», «Талант» коллективри виридан кIвачерик звер кутуна. Нигериядай тир Казима «Пейкер баха» мани лагьайла залди хордалди адаз жаваб гана. Ресторанда тухдалди кьуьлерна, манийрихъ яб акална, викторинайра иштиракна, хъсандиз ял ягъана мугьманри. Мярекат рикIел аламукьдайди хьана.

Альфият Руьстемова