Квез чидани?  |  2(261) 2013      

Къвердавай дуьньядин гьалар хьиз, инсанарни дегиш жезва. Абуруз гагь са, гагьни маса уьлкведа мусибатар арадал атуникай са гьихьтин ятIани нетижа хкудна имандихъ, мергьяметлувилихъ ялиз кIанзава. И кар иллаки чпихъ чIехи мумкинвилер авай ксарин, миллиардеррин, олигарх-рин арада адетдиз элкъвезва. Абуру фагьумзавайвал, дуьнья кесибриз куьмек гуналди, хийирлу крарихъ ялуналди, са-садан къайгъу чIугуналди хуьз жеда.
Эхиримжи вахтара дуьньяда заха ксарин кьадар къвердавай пара жезва. 2012-йисан виридалайни заха меценат Америкадин миллиардер Уоррен Баффет я. Ада са йисан къене кесибриз куьмек гун патал 3 миллиард доллар серфнава. Баффетан давамчияр тир Марк Цукерберга ва адан уьмуьрдин юлдаш Присцилла Чана инсанриз 500 миллион доллардин куьмекар гана. Стивен Спил-берга и кар патал 30 миллион доллар харжна.
И йикъара Британиядин Virgin Grouр корпорациядин иеси миллиардер Ричард Бренсона вичин веси малумарнава. И касди дуьнья дегишарайдалай кьулухъ адан миллиардар кесибриз ва виликди физ кIанзавай уьлквейриз куьмек гун патал серфда. Сифте яз ихтин весияр авурбур Америкадин миллиардерар тир Жорж Лукас ва Уоррен Баффет я. Гила и гьерекатдик Facebookдин иеси Марк Сукерберг, машгьур кинорежиссер Жорж Лукас, CNN телеканалдин кьил Тед Туьрнер, Украинадин миллиардер Виктор Пинчук, Россиядин санайидин магнат Вла-димир Потанинни экечIнава.
Россияда эхиримжи вахтара хийирлу крарихъ ялдай мад са адет арадал атанва. Чпихъ мумкинвилер авай ва я бизнесдихъ галаз алакъалу тир губернаторри чпин мажибар кесибриз куьмек гуниз, рекьер, муькъвер ва маса халкьдиз герек тир крар арадал гъун патал серфзава. И рекьяй Тула ва Киров вилаятрин кьилери иллаки чешне къалурзава. Гила Хабаровск-дин ва Камчаткадин кьилери чпин мажибар хийирлу крариз серф авун къарардиз къачунва. Хъсан чешне я!

Гаф атай чкадал лугьун ...

Чпихъ мумкинвилер авай бизнесменар ва районрин кьилер Азербайжандани авачиз туш. Чи уьлкведин кесибриз куьмек гудай, эл паталди хийирлу крарихъ ялдай меценатар арадал атанайтIа пис жечир!