Редакциядиз чар  |  1(260) 2013      

     Играми кIелзавайбур! Гьам куьн, гьамни редакция патал алатай йис кутугайди хьана. Квехъ галаз санал чна 2012-йисан 18-мартдиз Бакудин Музыкадин Академиядин чIехи залда "Самур" газетдин 20 йисан юбилейдиз талукьарнавай мярекат тухвана. Вишералди инсанар атанвай и мярекат анжах кIелзавайбурун ваъ, вири халкьдин сувариз элкъвена. Гьа мярекатдал къейд авурвал, къад йисан къене чахъ агалкьунарни, четинвилерни хьана. Виридалайни чIехи агалкьун ам я хьи, куь куьмекдалди "Самур" халкьдин газетдиз элкъвена, адакай милли кье-тIенвилерни чи руьгьдин чешмеяр хуьдай, лезгияр хъсан крарихъ ялдай газет, камаллувилин хазина, чи чIал виликди тухудай женгчи хьана. Субут патал са кьве делил рикIел хкун бес я. Алай вахтунда "Самур" Азербайжандин ва Дагъустандин кIелзавайбурулай гъейри 23 къецепатан уьлкведин кIелзавайбуруни къачузава. Абуру чаз юбилей тебрик авун патал 400-далай виниз чарарни телеграмаяр ракъурна. Санлай редакцияди Азербайжандай, Дагъус-тандай, Россиядин чара-чара вилаятрай, Туьркиядай, Германиядай, Швейцариядай, Америкадин Сад-хьанвай Штатрай, Латвиядай, Къазахстандай, Уьзбекистандай, Къиргъизистандай, Украинадай, Белорусиядай 746 чар къачуна. А чарарикай са кьадарбур газетдин чинризни акъудна.
     2012-йисуз чна куь куьмекдалди "Самурдиз" чи чIалахъ, литературадихъ, тарихдихъ, медениятдихъ, этнографиядихъ галаз алакъалу шумудни са цIийи темаярни рубрикаяр акъудна. Абурукай "Этногра-фия", "Архиврин геле аваз", "Ша, лезги чIалал рахан!", "Жеда жал?", "Алимрин веревирдер", "Чи халкь ва интернет", "Лезгины мира", "Интервью по просьбе читателей" хьтин рубрикаяр, "Известные лезгиноведы" рубрикадик кваз чапнавай "Карл фон Ган", "Унейзат Мейланова", "Мартин Хаспельмат", "С любовью Кавказу", "Михаил Ихилов" тIварар ганвай очеркар, "Кафкъаздин Албаниядин чIала-рикай", "Лезги чIалан меле", "Багъ-датдин факигь", "Qədim hürri izləri", "Digah", "Ləzgi dilində verilişlər eşidilmir", "Tənqidbazlıq, yoxsa gözü-götürməzlik?" хьтин макъалаяр иллаки куь рикIяй хьана. Куь тIала-буналди чна газетдин чинриз мадни цIийи ва марагълу темаяр акъудда, важиблу месэлаяр къарагъарда. И кар патал куьнени чаз мукьувай куьмек гана кIанзава, играми кIел-завайбур! Куь виридалайни кар алай куьмек лагьайтIа, газет кхьин я.
     Алай вахтунда "Самур" 3000-дин тираждалди акъатзава. Виликдай йисара адахъ 5000-дин тиражни хьанай. Авайвал лагьайтIа, виликай къвезмай кьвед-пуд йисан къене чаз тираж кьведра артухариз кIанзава. Мураддив агакьун патал чна санал, гьакъисагъвилелди зегьмет чIугуна кIанзава. И кардихъ къуьн кутуртIа, таъсиб чIугуртIа мурадни кьилиз акъатда. Ша, чна вичин 20 йис хьанвай, гележегдихъ умудар аваз виликди камар къачузвай "Самур" девирдин кIвенкIвечи газетрин жергеда хуьн патал къайгъударвал артухарин, адаз вири патарихъай куьмек гун.

... Эхирдай кьве хабар

     Эхиримжи кьве вацра Интер-нетда прессадихъ гелкъвезвай инсанрикай 28 касдиз "Самурдикай" гзаф хуш атана ва абуру редакциядиз зенг авуна газет кхьена.

***

     Чи къелемдин дуст Тат Къудрата и йикъара хабар гайивал, Къубадин муаллимрин кIвале райондин интелигентрикай са группади "Самур-дин" 2012-йисан 20-декабрдин тилитдиз акъуднавай "Tənqidbazlıq, yoxsa gözügötürməzlik?" макъаладикай хъсан патахъ веревирдер авуна ва ихьтин гьакъикъатдихъ ялзавай кхьинрай редакциядиз разивал къалурна.

"Самур"