|  8(255) 2012      

Ясабдай КцIариз физвай рекьин къерехда са дишегьлиди нехир чуьлдиз гьалзавай. Гагь-гагь лашунив рекьел экъечIай малар чуьл галайнихъ элкъуьрзавай. Адан акунри чун вичихъ ялна: вилерай нур чкIизвай сусан.

- Ви шикил чIугуртIа женни? - хабар кьуна чна.

- Вучиз жедач кьван? - сивик хъвер кваз жаваб гана ада.

- Нехирбан хьиз ви шикил газетдиз акъудайтIа, регъуь жечни ваз?

- Чи пайгъамбар Мегьамед алейгьсалама вичи нехирбанвал авунатIа, чаз вучиз регъуь хьана кIанзава? Им зи гьалал зегьмет я.

Сусахъ галаз мукьувай таниш хьана чун. Амирбекова Севил Мурадан рушан 43 яшар я. Вичин хизандихъ галаз КцIара яшамиш жезвай и кьуд аялдин диде савадлу дишегьли тирди гьасятда кьатIуниз жезвай. Ясабдал ам вичин яран буба Зейнеддин Амирбековаз куьмек гуз къвезвайди я. Нехирдин нубат агакьайлани агъсакъалдиз куьмек гуда. Икьван гагьди и кардив адан чIехи хва машгъул жедай. Ам аскервилиз фейидалай кьулухъ гьар нубат атайла нехир дишегьлиди вичи хуьзва.
Сусан гафар сакIани чи рикIелай алатзавачир:

- Регъуь жедай маса крар авайди я. Чун хьтинбуруз ваъ, кьуьзуьбуруз гьуьрмет, аялриз иесивал тийизвай, хизандин вилик жавабдарвал квадарнавай, зегьметдик къуьн кутун тавуна "цавай аватуй, сиве гьатуй" лугьузвайбуруз, жуван дидед чIал кваз кьаз-вачирбуруз, халкь кIвачик кутазвайбуруз, чIуру крарихъ ялзавайбуруз регъуь хьун герек я.