Чир-течир  |  7(254) 2012      

Са вахтунда Максим Горькийди вичиз ХХ виш йисан Гомер тIвар гайи СтIал Сулейманакай Лаху-тиди икI кхьенай: "СтIал Сулейманан тIвар эбеди яз дуьньядин миллионралди инсанрин рикIера амукьда." Гьакъикъатдани гьакI я. Вич чи арада амачиз 75 йис хьанватIани, чIехи шаирдин поэзия къвердавай жанлу ва гужлу жезва, ада миллионралди кIелзавайбурун ри-кIериз чимни экв гузва, абур уьмуьрдал ашукьарзава ва ам мадни хъсанарун патал женгиниз къарагъарзава.
Шумудни са уьлквейра СтIал Сулейманан эсерар тикрар-тикрар чапдай акъудзава. Адан яратмишунар ахтармишзавайбурун кьадарни къвердавай пара жезва. И мукьвара чи редакциядин мугьман хьайи, вич Дагъустандин Хуьруьгрин хуьряй тир жегьил литератор Мурад Саидовни гьа ихьтин ксарикай я.
М. Саидова лугьузвайвал, Сулейманан шиирар дуьньядин 100-далай гзаф уьлквейра чап хьанва. Гьа уьлквейрин газетри ва журналри шаирдин вишералди макъалаярни очеркар чапнава. Жегьил литератордихъ а материалар вири кIватIна, урус чIалаз элкъуьрдай ва кIелзавайбурув агакьардай ният ава.
М. Саидова лугьузвайвал, Азербайжандин 50-далай гзаф машгьур шаирри СтIал Сулейманаз шиирар бахшнава, адакай газетриз ва журналриз цIудралди макъалаяр акъуднава. Алай вахтунда жегьил литераторди Азербайжанда Сулейманаз талукьарнавай материалар кIватIзава. Ахпа ам Гуржистандиз фида. Гьа икI, шумудни са уьлквейрай материалар кIватIна, виликай къвезмай 3-4 йисан къене гзаф зурба ктаб акъудда ада.

"Самур"