"Самурдин мектеб"  |  7(254) 2012      

ГьикI кхьена кIанзава?

Агъа синифра кIелзавай са кьадар аялрилай  бязи глаголрикай дуьздаказ менфят къачуз алакьзавач. Агъадихъ чна и месэладиз баян гузва.
Вахчун (Гахчун, Къахчун, Ахчун). И гафарикай Гахчун Вахчун глаголдин рахунрин форма я. Ахчун нугъатдин гаф я. Гьавиляй литературный чIалал текст туькIуьрдайла Вахчун ва Къахчун гафарикай менфят къачуна кIанзава.
Вахчун гафунихъ агъадихъ галай манаяр ава: 1) жуван шей жуван ихтиярдиз хкун: За адавай цуьруьгъуьл вахчуна; 2) жуванди хьурун, жуваз кьун; 3) кIватIун, гьасилун: Ада цIи никIерай 50 тон къуьл вахчунва.
Къахчун гафунин манаяр ибур я: 1) жуван затI масадавай вахчун, къакъуд хъувун: За вавай вири къахчуда; 2) авайдалай артух яз вахчун: А як за къахчуна эцигнавайди я; 3) вичихъ галаз тухун: Пачагь вичин назир, везирни къахчуна, гадани галаз кIвализ хтана; 4) са вуч ятIани эцигай, алай чкадилай вахчун: Ахпа хтана за жуван ктабар къахчуна; 5) кIватI хъувун: Чакъалдиз сикIери  ачкар тIуьр саягъ акуна, амма сухварай акъатайди къахчуз тахьана, ада чил тIушунна; 6) жуваз талукьарнавай затI жував хьурун: Ам мажиб къахчуз атанвай.