Хабарар  |  7(254) 2012      

Хачмаз райондин Ергуьжрин хуьре арадал гъанвай будугъвийрин музейда гзаф марагълу экспонатар кIватIнава. И музей арадал гъиз куьмек ганвайбур чи республикадай къеце яшамиш жезвай будугъвияр я. Абурун макьсад и музейдин куьмекдалди халкьдин тарихдинни медениятдин делилар гележег несилрал агакьарун я. Музейда 1820-1825-йисариз талукь самовар, къадим хъенчIин къапар, квар, гетIе, чхра, халича храдай алатар, къадим халичаяр, кутарар, къажгъанар, негьреяр, курар ва маса затIар кIватIнава. Санлай ина 100-далай гзаф экспонатар ава. Абурукай виридалайни къадимди вичихъ пуд виш йисан тарихар авай къаб я.
Чеб лезги чIалан группадин халкьарикай тир будугъвийриз тарихдин вакъиайри гзаф басрухар гана. Халкьдин вадакай кьуд паюниз хайи чIал чизмач. Дидед чIал, тарих, меденият хуьн патал халкьдин кIвенкIвечи ксари генани чIехи алахъунар авуна кIанзава.