Газета Самур

Шаир яз атанай...
Эпитафия | 8(353) 2021

Вичин са акьван яшар тахьанмаз чавай къакъатай Лезги Бегьлулан 2008-йисуз Бакуда чапдай акъатай «Мулдин цуьк» ктабдин редактор Седакъет Керимовади кхьенвайвал, Бегьлул дуьньядиз шаир яз атанай. Адахъ са бязибурулай тафаватлу яз ялавлу ва женгчи гьиссерин, къени къилихрин, вичиз махсус дуьнья авай. ВерцIи хиялрин, чIехи мурадрин луварал алаз цIар ягъадай ада ватандилай. Кьакьанрай килигдай хайи чилиз. Гзафбуру кьатIузвачир затIарикай фагьумдай ада. Халкьдиз ам гьахъ кIани шаир яз чидай.

«Самур» газетдин дуст тир Лезги Бегьлул. Аял чӀавалай дидед чӀалал шиирар теснифзавай, лезгийрин фольклор кӀватӀзавай Лезги Бегьлулан чӀалар сифте яз чи газетдин чинриз ва редакцияди 2000-йисуз чап авур “Акъата шегъредиз” кӀватӀалдиз акъатна. 2008-йисуз шаирдин лезги чӀалал “Мулдин цуьк” тӀвар алай шииррин ктаб басма хьана. Шаирдихъ халкьдин патай гзаф гьуьрмет авай. Гьавиляй хуьруьнбуру чIехи гьевесдалди адан ктабдин презентация кьиле тухванай.

«Самурдиз» Лезги Бегьлулан макъалаярни акъатзавай. Ада хайи хуьруьн тарихдикай, тIебиатдикай, хийирлу крарихъ гел-

къвезвай инсанрикай кхьидай, редакциядиз фольклордин чешнеяр ракъурдай.

Лезги Бегьлул (Ибрагьимов Пагьливан Къарабеган хва) 1955-йисуз КцӀар райондин Зинданмуругъ хуьре дидедиз хьана. Хайи хуьре 8 синифдин, Уьнуьгъа юкьван мектеб акьалтӀарна. Азербайжандин Къецепатан ЧӀаларин Институт куьтягьай Лезги Бегьлула Зинданмуругьрин юкьван мектебда муаллимвал ийизвай.

Лезги Бегьлул лукьман хьизни сейли тир. Ада гатфарилай гатIунна къаяр алукьдалди инсанрин гел авачир чкайрай - дагъларин чархарилай, тамарин деринрай цуьквер, векьер, дувулар кIватIдай. Абурукай мелгьемар гьазурна начагъ ксар сагъардай. Гьавиляй Бегьлул тек муаллим хьиз ваъ, лукьман хьизни сейли тир.

Шаирди вичин кьвед лагьай шиирин ктаб чапдиз гьазурнавай. А ктабда адан цIийи шиирар ва поэмаяр гьатнавай. Хайи хуьруькай, дагъларикай, тIебиатдикай, кьегьал ксарикай теснифнавай шииррин бязибур хуьруьнбуруз хуралай чида. Гьа-йиф къведай кар ам я хьи, Лезги Бегьлулавай вичин кьвед лагьай шиирин кIватIал чапдай акъудиз хьанач. Адан уьмуьр вахт-суз кIар хьана. Са гафни авачиз, шаир кIани хуьруьнбуру адан ктаб чапдай акъуд тавуна тач.

Лезги Бегьлулан экуь къамат ам чизвайбурун рикIера гьамишалугъ яз амукьда. Аллагьди рагьмет авурай!

«Самур» газетдин коллектив