"Самурдин мектеб" | 7(352) 2021
Чи ибараяр
Лезги чIал ибарайралди девлетлу я. Ибарайри кхьинриз метлеблувални иервал гъизва, чIал фасагьатлу ийизва. Рахунра ва кхьинра мягькем ибарайрикай гегьеншдиз менфят къачун чIал хъсандиз чир хьунин лишан я. Чи редакциядиз чарар ракъурзавай бязи кIелдайбуруни чпин кхьинра ибарайрикай менфят къачузва. Ингье садбуруз са кьадар ибарайрин манаяр авайвал чизвач ва гьавиляй гъалатIриз рехъ гузва. КIелдайбуруз ва редакциядиз чарар ракъурзавайбуруз куьмек паталди чна агъадихъ са бязи мягькем ибараяр ва абурун манаяр гузва.
Авурди авуна – кIевера туна, писвал авуна.
Алидиз хух, дилидиз мух – гьарад са жуьреда гъилиз къачун.
Бишидаз ван хьун – аламатдин кар хьун.
Варар хкатайди – кьилел мусибатар атайди.
Вилер алахьун – къизмиш хьун.
Вирида ацазвай кал – вирида алцурарзавай кас.
Виляй къисун – вичел фикир желб авун.
Вири илигиз, цимил килигиз – масадан зегьметдалди кьил хуьн.
Гад гарал ракъурун – кIвалах тавуна вахт алудун.
Гъилер чуькьуз амукьун – затIни авачиз хьун.
Гьеллеяр авун – алцурарун.
Гьер тIуьр Гьарун – масад алцурна къазанжи къачур кас.
Девед хъел – лугьуз тежедай кьван пис хъел.
Истивут тIуьр кIек – дяве ийиз кIанзавайди.
Керекул ахъаюн – авачир хабарар гун.
Киле тай хьун – инсанди вич кьезил, лайихсуз тухун.
Къацузма-цIарузма – акьул балугъ хьанвач.
Къуфаран хьун – вичивай вичиз сабур гуз тахьун.
Кьве кьиляй фин – гьарай-вургьай кутун.
Кьил чукIун – ийир-тийир квахьун.
КIарарай акъатун – хъел акатун.
Наргъаяр кIелун – яргъалди рахана кьил алдахарун.
Пар алай деве – зегьметризни азиятриз таб гудай кас.
Пемпе цавуз акъудун – гатун, кукIварун.
РикIи цIирун – кIанз къаних хьун.
Рук къалурун – алцурарун.
Севре сувар – са затI къенят тавуна тIуьн.
Сиве сав кьун – чка атайла рахун тавун.
СинкI ягъун – чин-чинал акъвазна алцурарун.
ТIаб акьурди – лянет хьайиди.
ТIал алай чка – дерт.
Фу метIел хьун – авур хъсанвал квадарун.
Фуруз аватун – гъам-хажалат чIугун.
Хару гатайди – азиятар акурди.
Цаварай фин – уьте фин.
ЦIегьрез салам гун – жува нихъ галаз дуствал ийизватIа чир тахьун.
ЦIуз аватун – кьил къалмакъалда гьатун.
Ял такIан хьун – пехилвал авун.
Скачать PDF
Комментарии к статье
Будьте первым кто оставит комментарий к статье.Оставить комментарий