Алай йисан февралдин вацралай авална республикадин «Лидер»ТВ-да «Sənin ulduzun» («Ви гъед») тIвар ганвай конкурсдин 13 лагьай нубатдин передачаяр кьиле фена. И конкурсда чи райондай икьван гагьди са касдини иштирак авурди тушир. Гьа ТВ-да «Хуш гуьгьуьл» передачада иштиракдай чIавуз Нуьсретан агалкьунар акур «Ви гъед» проектдин продюссерди адаз вичин проектдиз теклифна. Гьа икI, пIитIишви жегьилди «Нуьсрет КцIарви» хьиз и проектда иштиракна. Конкурс кьиле фидай чIавуз Нуьсрет алакьунар авай жегьил хьиз Элчин Бабаева вичин шакIуртвиле хкяна. Ада жегьилдиз гитарадай мадни артух чирвилер гана. Конкурсда Нуьсрета лезги, азербайжан, урус, болгар, гьинд ва туьрк манияр тамамарна. Сифте йикъалай ада вичи кьунвай сад лагьай чка эхирдалди кIевиз хвена.

    Нуьсрет Мирзебегов 16 йиса ава. Ада гитарадал са шумуд халкьдин макьамар профессионалди хьиз тамамарзава. 

    Азербайжандизни Дагъустандиз сейли тир ашукь Нуьсретан хва Черкесан  хизанда гада аял дуьнядиз атайла, ада хтулдал чIехи бубадин твар эцигнай.

Вири аялар хьиз гъвечIи Нуьсретни хайи ПIитIиш хуьруьн мектебдик экечIна. Анжах адан рикI музыкадал гзаф алай. Гьавиляй вахт агакьайла Нуьсрета КцIарин харусенятдин мектебда тардин синифда Фаид Агъаеван гъилик чирвилер къачуна. Симерин алатдал макьамар тамамарун Мирзебеговрин ивидик квай хьтинди я. Конкурсдин передачайриз килигайбуру и кар тестикьарда: конкурсантдин гъвечIи ваха Зафинади вичин стхадиз гьикьван куьмекар ганай. Хуралай шиирар кIелун, макьамар тамамарун, гьатта вичи пианинодал ягъиз, «Къайи рагъ» фильмдай Яргунатан мани лугьун, вични жанлу эфирда. Конкурс тухузвай ашукь Намика Зафина муькуь иштиракчийриз чешне яз къалурнай.

    Алай вахтунда Нуьсрета Бакуда Азербайжандин Милли Консерваториядин кьилив гвай  коллежда вичин чирвилер давамарзава, II курс акьалтIарзава. Ада мугъамдай коллеждин муаллимар тир Жейгьун Гьуьсейновавай ва Бейлер Агъаевавай дерин чирвилер къачузва.

    СМС-рин кьадардални вичин алакьунралди конкурсда сад лагьай чка кьур Нуьсрета тамамарай сад лагьай гьинд макьамдилай, эхиримжи туьркверин «Кенуьл сайфам» тIвар алай лирик макьамдалди вирибуру хушвилелди кьабулнай. Гьавиляй Нуьсрет кьуд вацра кьиле фейи конкурсдин кубокдин иеси хьана. 

Нуьсрета мадни чIехи агалкьунар гъилик авун, адан тардин, чуьн-

гуьрдин, гитарадин ван мадни чIехи сегьнейрай атун чи мурад я. 

Баркалла хва!

 

Джавид МИГРАГЪВИ,

КцIар район