Азербайжан Республикадин Президент Илгьам Алиеван серенжемдив кьадайвал, алай йисуз ашукь Алескеран 200 йисан юбилей къейд ийида. Мярекат республикадин медениятдин министерстводи милли илимрин академиядихъ, образованидин министерстводихъ ва ашукьрин кIватIалдихъ галаз санал кьиле тухуда. 

   Азербайжандин Гуьйче магьалда дуьньядиз атана вири Къафкъаздиз сейли хьайи ашукь Алескер халкьдин рикI алай сеняткаррикай я. Адан поэзиядиз икрамзавай, вич асул Гуьйчедай тир Гьуьсейн Гьасанова са шумуд йис инлай вилик сифте яз Бакуда вичин кIвале ашукь Алескеран музей туькIуьрнай. Ина 3000-далай гзаф экспонатар кIватIнава. Абурун арада Азербайжандин 2000 ашукьдин шикилар, 650 ашукьдин ванер кхьенвай граммофондин валар, 400 кьван ашукьдин ктабар, 150 кассет, чуьнгуьрар, патефонар ва ашукьрин пекер ава.