Ярославль шегьер Москвадивай 250 километр кьван яргьа ава. Ина 1 миллиондив агакьна агьалияр яшамиш жезва. РикӀ шадардай кар ам я хьи, инин лезгияр сад-садан хийир-шийирдикай хкатдач. Абурун арада фин-хтунар, санал мел-межлисар арадал гьун хъсан адетдиз элкъвенва. Лезги адетар хуьн, лезги суварар санал къейд авун патал къайгъу чӀугвазва.

    Дагьустандин СтӀал Сулейманан райондин Агъа СтӀал хуьряй тир пуд стхади – Акпер, Беглер ва Аскер Эмироври, гьакӀни КцӀар райондин ЧӀакӀар Паласа хуьряй тир стхайри – Ширвани, Садикь ва Васиф Гьасановри 2005-йисуз Ярославль шегьерда къуьн-къуьне туна кIватIал туькIуьрна – «Самур» тIвар алай Лезги Медениятдин Меркез. И стхайри Ярославль шегьердиз са лезги гьава гъана, инсанрик лезги руьгь кутуна. Эхиримжи цIуд йисуз меркездиз Васиф Гьасанова регьбервал гузва. 

    Вилаятда 5 агьзурдалай гзаф лезгияр яшамиш жезва. Абурукай 2 агъзур кас меркездик экечӀнава. Аялар, жегьилар ва яшлубур патал лезги чӀалан мектеб тешкилнава. Исятда Ярославлда лезги ансамбль, симин пагьливанрин коллектив ава. Ансамблди “Урусатдин йикъар”, “Шегьердин югъ” хьтин тедбирра мукьувай иштиракзава. Ярославлда фад-фад медениятдин нянияр, поэзиядин йифер, концертар, мелер кьиле тухуда. И тедбирра шегьердин губернаторди, адан заместителрини иштиракда. Тешкилатди гьукуматдин органрихъ галаз санал кӀвалахзава ва абуру чпин патай гьамиша куьмекар гузва. Шегьердин общественный палатадик квай Васиф Гьасанова инин регьберар лезги меркездив агудун патал маса алахъунарни ийизва. Меркезди табасаранвияр, агъулвияр ва маса лезги халкьарни агуднава. Ада Урусатда авай лезги жемиятрихъ галаз алакъаяр хуьзва. 

    Азербайжандинни Урусатдин, гьакIни Дагъустандинни Урусатдин арада дуствилинни стхавилин муькъвер туькIуьрзавай чи ватанэгьлийрикай тир Васиф Гьасанован и мукьвара 50 йис тамам хьанва. Чна адаз чандин сагъвал, рикIин шадвал, руьгьдин кьакьанвал, гьакIни чIехи агалкьунар тIалабзава. 

 

«САМУР» ГАЗЕТДИН КОЛЛЕКТИВ