ЧIехи мегъуьн тарцин патав гвай са фура муьнуьгърин хизанди чпиз кlвал туькlуьрнавай.  Садра диде муьнуьгъди тамун хъчарикай афарар чрана. Афарар акьван тямлу тир хьи, адаз вичин кьуьзуь вахазни пай ракъуриз кlан хьана. Вахан кlвал тамун агъа кьиле, вацlун кьерез мукьва  чIехи пипин тарцин кIане авай. Дидеди вичин  шарагдив афарар вугана: «Ма чан хва, ибур халадиз твах. Жувни гьава мичlи тахьанмаз кIвализ хъша,» - лагьана ам рекье туна. 

    Югъ няни хьана, буба муьнуьгъ кIвалахар авуна  кlвализ хтана, гъвечlи муьнуьгъ лагьайтlа хтана акъатзвачир. Дакlардай килигиз гъвечlидан рехъ вилив хуьзвай муьнуьгърик къалабулух акатнавай. Йифни акъудна абуру, гъвечlи муьнуьгъ хтанач хьи, хтанач. Экуьнахъ фад вичин вахан кIвализ фена, ам иниз атанвачирди чир хьайила диде муьнуьгъдин вилерал нагъв акьалтна. 

    Хайибур и гъвечIи муьнуьгъдик къекуьн тавур чка, ам суракь тавур гьайван хьанач, ингье адакай са хабар авачир. Гъвечlи муьнуьгъ квахьай йикъалай адан дидени буба дердини кьуна.

    Диде муьнуьгъди вуч чрайтlа  адакай са бадида авайди мегъуьн тарцин кIаник квай чlехи къванцел тадай. «Каш физвайда тlуьрай, сувабдикай зи шарагдални гьалтрай»  – лугьудай ада.  Бади лагьайтIа, ацlунни ичIи хьун сад жедай. Диде муьнуьгъдиз хвеши жедай. 

Са варз икl алатна. Садра диде муьнуьгъдиз вичи чрай пичlекрикай бадида таз кlан хьана, ингье бади чкадал аламачир. ЧуьнуьхгумбатIдиз рикlе ахмурарна хтана ам кlвализ. 

    Гьа нянихъ муьнуьгърин кlвалин рак са ни ятlани гатана. Дидеди рак ахъаяла адаз вичин шараг акуна. Муьнуьгърин хизандин хвешивилин и кьил а кьил авачир. «Вун икьван гагьди гьина авай, чан дидедин?» – лагьана шехьна диде. Бубади вичин шарагдиз темен гана. 

    ГъвечIи муьнуьгъди абуруз вичин кьилел атайбурукай ихтилатна:

    – Кlваляй акъатна рекье гьатайла зи гуьгъуьна  са жанавур гьатна. Адан сарак акат тавун патал катна зун. Садлагьана кlвач галкlана акъалдайла, зи кьил са къванце акьуна. Гьа акьунихъди зи рикlелай гьар са затI алатна. Жув вуж ятlа,  кlвал гьинватlа чизмачир заз. Са кумадин рак гатана за. Гена кьифре зун къенез ахъаяйди. Ада заз аявална. Са кар авай хьи, ада са гьафтеда незвайди за са юкъуз тlуьна куьтягьзавай. Кьиф заз тlуьн жагъуриз гъиляй фенвай. Ингье садра ам хвешила хтана. Лагьана хьи, тама са чIехи мегъуьн  тар ава, адан кIаник квай къванцел са ни ятIани гьар юкъуз са бади ацlай тlуьн тазва. Са вацра гьа бадида авай тlуьнрив кьил хвена чна. Садра гьикI ятIани кьиф бадини гваз хтана. Адаз бади къуьлуьв ацlурна чкадал эхцигиз кlанзавай. Бади акур кумазни  зи рикlел гьасятда гьар са затl хтана: вунни, бубани, чи кlвални. Имни гьа бади! – ИкI лагьана гъвечlи муьнуьгъди хъуьрез-хъуьрез бади дидедив вугана. Къуьлуьн тварарин арадай кьил хкудна кьифре килигзавай. Чпин шарагдиз икьван хъсанвилер авур и заха гьайван муьнуьгъри чпин хизандиз кьабулна. Масадаз авур хъсанвилин эвез диде муьнуьгъдив ахгакьнавай.

 

Азизрин СЕВДА