Майтабан фу
Мах  |  7(344) 2020      
    Хьана кьван, хьанач кьван Майтаб тIвар алай са иер руш. Ахьтин иерди санани авачир. Ингье руш гьикьван иер тирIа, адан мез са гьакьван туькьуьл тир. Адан сивяй садрани са хуш гаф акъатдачир. Гьавиляй мукьва-кьилийринни къуншийрин адав ара авачир. Майтабан чIуру къилихар чиз, садни адаз илчивилиз 
къвезвачир. Гьа икI, ялгъуз амай ам.  
    Майтаб алахъдай хьран фу чраз, ингье ада чразвай фу гагь кудай, гагь чикIидай. Къаркай са юкъуз ам мад гъилера фу чраз алахъна. Мурмурар ийиз тини ишиниз эгечIна. «Сятралди алахъзва зун, и баят хьайи тини хкаж жедайдаз ухшар туш. КIвалакIар аку кIалубсузда кьван», – лугьуз акъваззавачир Майтабан сив. Фу акьалдайла: «Куьн вучиз ихьтинбур я, сад-садалай какур, пад алатайбур?!» – гъургъурзавай ада. Гьа икI, хьракайни ягьанатна руша: «Хьар аку, запабар авунвай хьтинди. Вун арадал гъайи устIардин гъилер члахъ хьурай!» 
    Рушан агъудив ишинна, ахмуррив чрай фу хьрай и гъилерани чIаганваз, пад хъухъванваз акъатна. Акатна Майтабахъ хъел. Гадарна ада ферчинни кве санихъ, кIар хьрал гьалчна юкьвалай хана, цIакулар цIуз вегьена. Ахпа угьуяр ягъиз шехьна. 
    Рушан ванцел къунши къари атана акъатна. Майтабан чIуру къилихрикай хабар тир ада хьран кIвализ гьахь тавуна жузуна: 
    – Я чан руш, вуч хьанва? Вун вучиз шехьзва?
    Майтаба вичин саягъда шел-хвална къаридиз. Къариди ам секинарна лагьана: 
    – Ша чна къуншийри фу гьикI чразватIа килигин.
    Руш вилин накъвар михьна, къаридин гуьгъуьнаваз кIвенкIве къунши Нариятан хьрак фена. Нарията тини ишинзавай. РакIарихъ Майтаб акур папа вичи-вич квадарна, анжах гьакI ятIани чина хъвер аваз:
    – Ша, вун атуй, рагъ атуй! – лагьана. – Ацукь, исятда чна чар авай фу чрада. 
    Майтаба кьве вил илисна Нарията вуч ийизватIа килигзавай. Къариди лагьайтIа, кIарасар агудиз, цIай хкажиз, вичелай алакьдайвал куьмек гузвай.  Са герендилай Майтаба къаридин япал лагьана:
    – Ада вири крар гьа за хьиз ийизва. Бес вучиз за чразвай фу тIили фалай кьелечI, къванцелай кIевиди жезва? 
    – Чан руш, вуна адан крариз ваъ, лугьузвай гафариз фикир це. Гьар ван хьайи алхиш рикIел хуьх, – лагьана къариди. 
    Нарията текнедиз гъуьр эчIирна лагьана: «Цинин гъуьр гзаф берекатлуди хьана. Чи никIерин къуьлер бул хьурай.» Ахпа ада гъуьредиз яд ягъана: «Яд аку, са кьил дагъдай къвезва, вилин нагъв хьиз михьи я. Ихьтин цив ишинай тини татана женни?» 
    Нариятан тини къведалди къариди Майтаб муькуь къуншидин хьрак тухвана. Магьията фу акьализ-акьализ лугьузвай: «КIвалакIар иерда кьван аку тIун! И фу ракъинилай иерди, вацралай керкилди жедайди я!»
   Гьанай акъатна фена абур Саиматан хьрак. Саимата фаз цIакулар ягъана, ам ферчиндаллаз хьраз вегьиз алхишарзавай: «Чи хьракай авайди туш, къван вегьейтIа гьамни памбаг хьиз чрада. И хьар арадал гъайидан гъилериз тIал такурай. Ихьтин хьракай къарагъиз кIан женни инсандиз?» 
   Эхирни Майтаба къаридиз лагьана: 
   – Исятда хъфена фу чурун тавуртIа, зи вилиз ахвар фидач. Вун захъ галаз къведани? 
   Къари рази хьана. ЭгечIна Майтаб кIвалахдив. И чIавуз къариди Майтабав агатна лагьана:
    – Гьа, чан руш. Гила вуна ван хьайи кьван алхишар гъуьредик кутур. 
    Майтаб хъсандиз рахунивай, алхишар авунивай кIвалахни вилик физ-вай адан. Сад лагьай гъилер тир ада ишинай тини хкаж жез.  Майтаб вичин вилерин чIалахъ жезвачир. Хьрай сад лагьай фу акъатайла адан хвешивилин и кьил а кьил авачир. Ада къаридиз килигна, милидаказ лагьана:
    – Чан баде, вуч хъсан хьана вун атана. Фан кьелни гил верцIи гафарни михьи фикирар я кьван!
АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Къарабагъдин женгер Санал кхьена Ürəklərdə yaşayacaq ЦIар амукьда
Статьи из этой рубрики
Хъсанвилиз писвал Жив такур гъед Гатфар ЦIийи рагъ Дидеяр
ЦIИЙИ ТИЛИТ
№: 8(353)
декабрь, 2021

Скачать PDF

РУБРИКИ
Tarixin izi ilə
Gəncliyimiz – qürurumuz
Чи къагьриманар
Yubiley
Люди и судьбы
Шаирар
"Самур" - 30
Редакциядин дустар
Яран сувар
Qarabağ müharibəsi
Diqqət: İnsan taleyi!
İnam və iman
"Soyuq günəş"
ЦIийи фильм
Dünya xalqları
Чи тарих
Тарих авайвал
Müsahibə
Спасём планету
Dünya ləzgiləri
Дагъустан
Диктант
Чи кьегьалар
Редактордин гаф
Чи классикар
"Самур" - 20
Мах
ЦIийи ктабар
Жеч гьа!..
Dağıstan xalqları
И чил хайи диге я
Добрые вести
Milli Məclisə məktub
Новости Россотрудничества
Известные лезгины
Марагълу инсанар
Redaksiyaya məktub
Языки мира
Лезги чIалан месэлаяр
Квез чидани?
Известные лезгиноведы
Лезгияр вирина
Юбилей
SOS!!!
С верой в душе
"Самурдин мектеб"
Мораль
Чи адетар
Məşhur ləzgilər
Новости на все голоса
Чи хуьрер
Хъсан хабарар
Известные кавказоведы
Чи адетар
Yeniliklər
Чешне къачу!
Чакай кхьенай ...
Алимрин веревирдер
Çıxışlarımızın əks-sədası
Барка
Эпитафия
Ша, лезги чIалал рахан!
Хабарар
Тарихдин геле аваз
Поэзия
Харусенят
Этнография
Дагестан
Народы мира
Спорт
Инсанар, кьисметар
Редакциядиз чар
Чир-течир
Yeni kitablar
Фольклор
Чи сейлибур
Дайджест
Чи тавдин кIвал

ПОЛЕЗНОЕ