Лезгияр вирина | 4(341) 2020
Youtube-дин «Kənd həyatı» каналди Ремихановар вириниз сейли авунва. И канал арадиз гъанвайди КцIар райондин Хьилерин хуьряй тир Эмираслан Ремиханов я. Гзаф йисара Бакуда дадлу хуьрекар чраз тIапIахъанвиле кIвалахай ам карантинди кIвалах авачиз туна. Гьавиляй гадади 2019-йисан майдиз вичи арадиз гъайи блог кардик кухтун къарардиз къачуна. КIвалахдай чIавуз адаз и кардихъ гелкъведай вахт жезвачир.
Карантин алукьайла хуьруьз хтай, гъилер хъуьчIуьк кутуна ацукьиз кIан тахьай Эмираслана вичин диде Азизадиз лезгийрин, азербайжанвийрин, Европадин халкьарин хуьрекар чрана Youtube-дай къалурун теклифна.
Багъдиз, салаз, мал-къарадиз къуллугъзавай дишегьли вахт жагъурна вичин хцин мурад кьилиз акъудиз алахъна. Гила ам Youtube-дин гъед хьиз вириниз сейли я.
Алай вахтунда видеоблогдихъ 37 агъзур кьван кхьенвайбур ава. И рекъем къвердавай пара жезва. Икьван гагьди каналдивай пул къазанмишиз хьанвачтIани, абурухъ гзаф дустар ава. Азербайжандай 30%, Урусатдай 17%, Туьркиядай 9%, Германиядай 6%, Америкадин Садхьанвай Штатрай 3,4% тамашачийри абуруз килигзава.
Лезги бадеди чразвай хуьрекар вириниз сейли хьанва. Мукьвара Facebook-да вичихъ 25 миллиондин аудитория авай Taste Life чини Азиза Ремихановади афарар гьикI чразватIа къалурна. И чинин модераторди гьакIни электрон почтадин куьмекдалди Эмирасланавай ижаза къачуна адан каналдин пуд видео къалурнава.
«САМУР»
Скачать PDF
Комментарии к статье
Будьте первым кто оставит комментарий к статье.Оставить комментарий