Газета Самур

Шаирар рекьидач
"Самурдин мектеб" | 4(341) 2020

Фадлай ихьтин руьгь кутадай хабар агакьнавачир чав. КцIар райондин Манкъулидхуьре чи ялавлу шаир, азадвални гьахъ патал женг чIугур, гьавиляй кулакри вич яна уьмуьр кьатI авур, гуьгъуьнлай вичин сурни квахьай Кесиб Абдуллагьаз (Абдуллагь Сарухановаз) адан хуьруьнбуру гуьмбет хкажнава. И суваб кардик

къуьн кутурбур чи къелемэгьли Вакъиф Муьшкуьрви ва кьегьал кас хьиз хуьруьнбурун гьуьрмет къазанмишнавай карчи Оруж Оружов я. Абуруз пулунин такьатралди куьмек гайиди Кесиб Абдуллагьан хтул Мавлуд Местеров я.

Абдуллагь Саруханов 1875-йисуз Къуба магьалдин Манкъулидхуьре дидедиз хьанай. Аялзамаз етим хьайи гадади вичиз кӀел-кхьин чирнай. Ада девирдин гьахъсузвилерни агъайрин инсафсузвилер негьдай цIай галай шиирар («Приставдин бармак», «Экуь дуьнья», «Тахьурай» ва мсб.) теснифнай. Совет гьукумат хушвилелди кьабулна адаз къуллугъиз эгечIай Кесиб Абдуллагь кулакри яна кьенай.

Кесиб Абдуллагьан са кьадар шиирар чи камалэгьли Забит Ризванова кӀватӀна Магьачкъалада чап-дай акъуднай. Шаирдин эсерар лезги чIалан тарсар гузвай мектебра чирзава.

Кесиб Абдуллагьан ирс кIватIун, адан мукьва-кьилияр жагъурун патал гзаф зегьмет чIугвазвай В.Муьшкуьрвидизни О.Оружоваз и кардай тек манкъулудхуьруьнвийри ваъ, гьакIни лезги поэзиядал рикI алай вирибуру баркаллагь лугьузва.

Гила Манкъулидхуьруьн сурара шаиррин аллея ава. Ина лезги поэзия чпин шиирралди девлетлу авур пуд кас - Кесиб Абдуллагь, Забит Ризванов ва Медет Эрзиманов са жергеда кучукнава. И карди ихьтин гафар рикIел хкизва: Инсанар чпел чан аламаз кьван яшамишда, халисан шаирар чилел чан аламаз кьван.

«САМУР»