Мад рикӀе хвеш куькӀвена
Поэзия  |  3(340) 2020      
   Агьмедов Мукаил Агьмедан хва (Агъмедрин Мукаил) 1954-йисан 31-августдиз Ахцегь райондин Ухулрин хуьре дидедиз хьана.
   1971-йисуз ада Усугъчайдин юкьван мектеб акьалтӀарна. Дагьустандин университетдин химиядин факультетдик экечӀна ва 1972-йисалай кӀелун Азербайжандин Гьукуматдин Университетдин химфакда давамарна. 1976-йисуз анаг акьалтӀарна Дагьустандиз хтана. ДГУ-дин умуми химиядин кафедрада лаборантвиле, гуьгъуьнай «Даггаз» идарада кьилин инженервиле кӀвалахна. 1977-1980-йисара ада Ухулрин хуьруьн мектебда муаллимвиле кӀвалахна. 1980-йисалай къенин йикъалди Мукаил Агьмедова Мегьарамдхуьруьн райондин Буткъазмайрин юкьван мектебда кIвалахзава. Шиирар 1973-йисалай кхьизва.
   Адан шиирар «Къизилгуьлдин мани» (1986), «Къуьлуьн кьилер» (1991) уртах кӀватӀалрик акатнава. Шаирдин «Камбар булах» (2000), «Гьахъунин ван», «Зи умудрин елкен» (2009), «Бинейрин кьилив» (2014) ва «Руьгьдин хирер» (2018) ктабар чапдай акъатнава.
 
ФИКИРНА ЗА...
 
Фикирна за яш хьайила, 
Бегьердикай дестек жеда. 
Камалди зи цуьк гъайила, 
Хтулрикай безек жеда.
 
РикӀин ният гьакӀ амукьна, 
Элкъуьн тийиз гьакъикъатдиз. 
КӀвач галкӀана, пис алукьна, 
ЦӀук акатна мусибатдин.
 
Гъед хьиз, хьайи цикай магьрум, 
Амукьна буш, къайи гъенел. 
Йикъар хьана лал хурушум 
ЧӀавун къаю гатазма пел.
 
Умуд, сабур рикӀяй жуван
Акъудзавач стӀун гьеле.
ЧӀав я зарбдиз физвай карван,
ЧукӀур хъийин белки желе.
 
 
РАГАЛ АЛУКЬНА
 
Зун дуьньяда лувар кьатӀна, 
Къураба яз амукьна.
Хкаж жезвай гурар кьатӀна,
Лекь хьиз рагал алукьна.
 
Зун дуьньяда рикӀ дакӀуна,
Гьахъ такуна, амукьна.
Къаю гьалчна хур къазунна,
Пак ниятар кьулухъна.
 
Заз руьгьдин хер сагъ хъийидай 
Лукьман гьатнач генг чилел.
Зи утагъдиз рагъ хкидай,
Чирагъ гьатнач тир эфзел.
 
ЯтӀани зи умуд кума,
Туш рей гайи есир хьиз.
РикӀик крар шумуд кума,
Тадай элдиз гишир хьиз.
 
 
ЗИ УМУДРИН СИРЛУ ЕЛКЕН
 
Зи умудрин сирлу елкен гьуьлелла, 
МуьтӀуьгъ тежез бед тӀурфанриз вахтунин. 
...Худади заз кхьенвайди, пелелла,
Белки са экв акван зазни бахтунин.
 
ЭкъечӀунал кьве вил алаз авазва,
Зун, умудрин сирлу елкен сеферриз.
Туьнт лепейри кфарин цӀиргъ хразва, 
Гьуьлуь даим гатаз елкен, зенгериз.
 
Зи умудрин елкен ингье юзана, 
Кьисметдин рехъ серт гарарин гъилеваз. 
Мад рикӀе хвеш куькӀвена зи, хтана 
Физва елкен мурадрин пар хивеваз.
 
Сирнавзава зи умудрин елкенди,
Адалай гьич алудзавач вилер за.
Ам зи рикӀин хиялрин кӀвал, мескен тир, 
Ракъурзавай яргъай чими гьиссер за.
 
Алад елкен, атӀутӀ яргъал мензилар, 
Ви таждик кваз яшамиш хьун бахт я зи. 
Вун я зи дерт ийизвайди кьезилар,
Батмиш хьайтӀа, рекьидай фад вахт я зи.
 
 
ХУЬРЕ АВА ЗУН
 
Бегьерлу гад, зулар амачир, 
Нехир хуьдай тӀулар амачир, 
Сал дигидай ятар амачир, 
Кфетлу тир хъчар амачир 
Хуьре ава зун.
 
Хьрай ризкьид атир техкъвезмай,
Багълар аваз гелир техжезмай, 
Пакад къакай фикир техжезмай, 
Писвилерин эхир техжезмай 
Хуьре ава зун
 
Жегьилриз кар, кӀвалах авачир, 
Руьгьдин дестек, пайдах амачир, 
Гьукумдаррин чӀалахъ амачир,
Далу гудай уймах авачир 
Хуьре ава зун
 
Чил цаз ракьун балкӀан амачир, 
МискӀин аваз азан алачир, 
Азад, ачух майдан амачир, 
Кьуд пад хъуртар - дарман авачир 
Хуьре ава зун.
 
Бул я йифер эквер тежедай, 
Бул я кицӀер верчер хъечедай, 
Идараяр - регьбер тежедай, 
Къенивилин тегьер тежедай 
Хуьре ава зун.
 
 
УЬМУЬРДИЗ
 
Гагь къарагьиз, гагь алукьиз, 
Уьмуьрдин рехъ гатана за.
Вун гьинава? Гьахъ суракьиз, 
Лугьуз мензил атӀана за.
 
Куьз туькьуьлвал багъишна заз, 
Алпапа хьиз къаргъишна заз, 
Пашман сегьне къурмишна заз 
Кал тир бегьер дигмишна заз?
 
Гагь батӀулиз жаза гана,
Кьил хаз харци къаза гана, 
РикӀиз тӀарвал, суза гана,
Набут хьайла аса гана.
 
ЧӀухутӀ тунва тагъмади ви, 
Сефил аваз нагъмади ви,
Уьзуьр тунва хумади ви, 
Хирер, кьацӀар кӀармади ви.
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
Яран сувар атана... Руьгь начагъ тахьурай! Дидед чIал ватан я Къайгъу чIугун кьегьалвал я Vadir Əfəndi
Статьи из этой рубрики
В поисках талантов Булахда яд ава СтIал Сулейманаз гуьмбет хкажна Лезги чIал кIанарзава Са маса тIям ава Ватандин чилихъ
ЦIИЙИ ТИЛИТ
№: 7(352)
октябрь, 2021

Скачать PDF

РУБРИКИ
Шаирар
"Самур" - 30
Люди и судьбы
Yubiley
Чи къагьриманар
Tarixin izi ilə
Gəncliyimiz – qürurumuz
Müsahibə
Dünya ləzgiləri
Яран сувар
Diqqət: İnsan taleyi!
İnam və iman
Спасём планету
Qarabağ müharibəsi
Редакциядин дустар
Редактордин гаф
Дагъустан
Диктант
Чи кьегьалар
Чи классикар
"Самур" - 20
Мах
И чил хайи диге я
Жеч гьа!..
Dağıstan xalqları
ЦIийи ктабар
Milli Məclisə məktub
Языки мира
Марагълу инсанар
Redaksiyaya məktub
Лезги чIалан месэлаяр
Известные лезгины
Новости Россотрудничества
Добрые вести
Квез чидани?
Юбилей
Лезгияр вирина
SOS!!!
Известные лезгиноведы
С верой в душе
"Самурдин мектеб"
Мораль
Чи адетар
Məşhur ləzgilər
Чи хуьрер
Новости на все голоса
Известные кавказоведы
Хъсан хабарар
Чи адетар
Yeniliklər
Алимрин веревирдер
Чакай кхьенай ...
Чешне къачу!
Çıxışlarımızın əks-sədası
Ша, лезги чIалал рахан!
Эпитафия
Барка
Хабарар
Харусенят
Поэзия
Этнография
Тарихдин геле аваз
Дагестан
Народы мира
Спорт
Инсанар, кьисметар
Редакциядиз чар
Чир-течир
Yeni kitablar
Фольклор
Дайджест
Чи сейлибур
Чи тавдин кIвал

ПОЛЕЗНОЕ