Азербайжандин лезги агьалийри чи чилер хуьдайла, эрмени чапхунчийрихъ галаз дяведа ивияр экъична, шегьидар гана. За и кьегьалвилериз чIехи тир къимет гузва, чи халкьдини къимет гузва, тарихдини лайихлу къимет гуда. За чи шегьидрин, гьакIни республикадин лезги агьалийрикай тир шегьидрин руьгьдин вилик кьил агъуззава ва лезги агьалийриз жуван разивал къалурзава.

Гьейдар АЛИЕВ

 

     Алай йисан 28-августдиз Бакуда Азер­байжандин Яракьлу Къуватрин Ветеран­рин Комитетда зурба са мярекат кьиле фена. Им Къарабагъдин женгера чIехи кьегьалвилер къалурай, 1991-1995-йисара «Лезги лекь» тIварцIелди сейли хьайи командир Бегь­рам Агъакишиевакай чIугунвай 30 де­кьи­кьадин “Женнетдин рекье авайди” тIвар алай фильмдин презентация тир. Ва­тан­дин ЧIехи дяведин ва Къарабагъдин дя­ведин ветеранри, республикадин яракьлу къуватрин пешекарри, журналистри фильм­диз санал килигна.

     Фильмда ихтилатзавайвал, Бегьрам Агъакишиев 1966-йисуз КцIар райондин ГуьндуьзкIеле хуьре дидедиз хьана. Ина юкьван мектеб акьалтIарна аскервилиз фейи ада гуьгъуьнлай Ростовдин Военный Училищеда кIелна.

     1991-йисуз гуьгьуьллудаказ Азер­байжандин Яракьлу Къуватрик экечIай Бегьрама машгьур Дашалтыдин женгера кьегьалвилер къалурна. Гьавиляй ам цIийиз туькIуьрнавай жегьилрин взводдин командирвиле тайинарна. Взводдик адан стха Эйвазни квай.

     Разведкадин взводдин командирди хьиз Лачиндин ва Келбежердин фронтра тафаватлу хьайи жегьилдиз вахтундилай вилик кьилин лейтенантвилин чин ганай.

     Агъдам-Физули пата кьиле фейи женгера чешнелу хьайи Б.Агьакишиеваз гьакIни вахтундилай вилик капитандин чин ганай.

     1995-йисуз Б.Агьакишиев военный частунин командирвиле тайинарнай. 1997-2000-йисара ада Азербайжандин Сергьятдин Кьушунрин къул­лугъ­дин регьбервиле, гуьгъуьнлай яракь­лу къу­ват­рин кьулухъ пад таъминардай къул­лугь­дин начальникдин замес­ти­тел­ви­ле кIвалахна. Ам Ленкорандин сер­гъят­дин кьушунрин начальникдин за­мес­ти­телни хьана. Полковник-лейтенант Бегь­рам Агьакишиев 2003-йисалай пен­сия­диз фенва.

     Б.Агъакишиеван женгинин рекьикай гегьеншдиз ихтилатзавай фильмди ви­рибуруз кIевелай эсерна. Вичин рикI Ва­тандиз муьгьуьббатдивди ацIанвай, тIвар Къарабагъдин дяведин тарихдиз къизилдин гьарфаралди кхьенвай лезги кьегьалдикай адан женгинин юлдашри лагьай гафарай малум жезвайвал, Бегьрам зурба разведчик, кичI тийижир командир, инсанар агудиз, абурун рикIера умудар тваз алакьдай, датIана вичин аскеррин къайгъу чIугвадай командир тир. Ада гуьллейрин марфадин кIаникай хер алай аскерар хкуддай. Садрани кьенвай аскерар женгинин майдандал тадачир. Гагь-гагь мажбур хьана вичин командиррин эмирриз акси экъечIна, чIехи агалкьунралди, кьиникь авачиз душмандиз уфтан жедай.

     Фильмдин виридалайни марагълу чкайрикай сад 1995-йисан февралдиз Азербайжан Республикадин Президент Гьейдар Алиеван лезги халкьдин векилрихъ галаз хьайи гуьруьшдикай ганвай чIук тир. Анал «Самур» Лезги Милли Меркездин кьил профессор Али Мусаева Къучаздин кьакьанвал гъилик авун патал тухвай женгера кьегьалвилер къалурай Бегьрам Агъакишиеваз «Азербайжандин Милли Къагьриман» гьуьрметдин тIвар гун патал 701-нумрадин частунин командирди месела къарагъарнавайди рикIел хканай. Президент Гь.Алиева вичи и месела гья­лун Рамиз Мегьдиевал тапшурмишда, и кар паталди герек тир вири крар ийида, – лагьанай.

     Архивдин материалрал бинеламиш хьа­на чIугунвай фильмдин сценарий кхьен­вайди Илгьам Тумас, режиссер  Ни­жат Жалилов, редактор Рей Керимогълу я. Текст кIелзавайди ва проектдин кьил «Азербайжандин Левитан», вич ва­тан­пе­рес манийралди сейли тир Шемистан Ализаманлы я.

Авайвал лагьайтIа, жуван ватан­эгьли­­дикай кьилди чIугунвай ихьтин зурба фильм­диз килигай зун мярекатдай хве­шила, руьгь акатнаваз хтана

 

Седакъет КЕРИМОВА