Алай йисан 17-июндиз Дагъустан Республикадин СтIал Сулейманан райондин депутатрин Собранидин 21 лагьай сессия кьиле фена. Мярекатда райондин кьил Нариман Абдулмуталибова, адан заместителри, талукь идарайрин кьиле авайбуру, ичтимаиятдин ва информация гудай такьатрин векилри иштиракна. Инал гзаф кар алай са месэладикай веревирдер авуна. Райондин ичтимаи тешкилатри, Хайи ЧIалан Муаллимрин Ассоциацияди, Дагъустандин Зарийрин КIватIалдин чкадин отделди, «Куьредин ярар» медениятдин меркезди, гьакIни юкьван мектебрин директорри администрациядиз гьар йисуз «Лезги чIалан югъ» тIвар алай сувар тайинарун патал теклиф ганва.

     Теклифдихъ авсиятда райондин медениятдин идарадин кьил, Дагъустандин халкьдин шаир Майрудин Бабаханов рахана. Ада лагьана: «ЧIал халкь хуьзвай кьилин такьат я. ЧIал квахьайтIа, халкьни квахьда, ватанни. Гьавиляй хайи чIал хуьн ва вилик тухун чи виридан буржи я. Ганвай теклифдинни гьа и кардиз къуллугъзава. Ша чна талукь къарар кьабулна ганвай теклиф кьилиз акъудин.»

 м    Сессиядал депутатри вирида сад хьиз сес гана цIийи сувар – Лезги чIалан югъ тайинарна. И сувар гьар йисан 10-октябрдиз кьиле тухуда. Мярекатдин иштиракчийри маса лезги районризни ихьтин сувар тухун теклифна.

 

Тамилла БЕКЕРОВА, 

Дагъустан Республикадин 

Дербент шегьер, 

муаллим