Юбилей | 5(331) 2019
Алай йисан 29-июндиз мад гъилера къадим Ахцегьа лезгийрин женгчивилин руьгь кваз теснифнавай «Шарвили» эпосдин сувар гурлуз кьиле фида. 2000-йисалай инихъ къейд ийизвай и мярекат цIинин йисузни виниз тир тешкиллувал, гзаф кьадар мугьманрин иштираквал аваз тухуда.
Мярекатдин юкъуз пакаман сятдин иридаз КIелез хивяй, Шарвилидиз ротонда эцигнавай кукIушдилай кьавалри лезги авазрик ван кутада. И ванер Самур ва Ахцегь вацIарин дереяр тирвал чикIида. Китин дагъдин кьилелай абур къадим Гиярдивни агакьда.
Суварин кьилин мярекатар, гьамиша хьиз, гилани Советрин Союздин Игит Валентин Эмирован тIварунихъ галай багъда кьиле фида. Виликан йисарилай тафаватлу яз ина маничияр ва мугьманар патал сегьнедин ва залдин майданар генани хъсандиз туькIуьрнава. Марф къвайитIа, кьилелай таж чIугуна кIевирнавай ина ракъиникай хуьдай мумкинвал хьанва.
Иниз къведалди мугьманар и ва маса майданрал кардик кутазвай халкьдин яратмишунрин, сеняткарвилин выставкайрихъ, харусенятдин ва уьлкве чирдай музейрин экспонатрихъ галаз таниш жеда.
РикI шадардай кIвалах ам я хьи, «Шарвили» эпосдин сувар къвердавай вичин халисан кIалубда гьатзава, адан метлеб артух жезва ва Дагъустандин вири халкьарин рикI алай сувариз элкъвезва.
Айтекин БАБАЕВА,
Къебеле район
Скачать PDF
Комментарии к статье
Будьте первым кто оставит комментарий к статье.Оставить комментарий