Поэзия | 4(330) 2019
КцIар райондин Чпир хуьре дидедиз хьайи Лейла Жавадовадин шиирар тесниф авунал гзаф рикI ала. Вичин 22 йис тир ада хуьруьн юкьван мектеб акьалтIарна.
И мукьвара «Самур» газетдин редакциядиз атай Лейлади чав вичин шиирар вугана. Сифте яз жегьил къелемэгьлидин са шумуд шиир газетдин чинриз акъудунихъди чи ният адак руьгь кутун, поэзиядин алемда вич тестикьаруниз куьмек гун я.
Лейла Жавадова
Хуьн чна
Дамахда за ватандин
Къванерални рикIивай.
Терг хьанай ам хуьн патал
Шумуд кьегьал рикI авай.
Ватандин тIвар кьаз вине,
Женг чIугунай бубайри.
Гардан кIирнач садрани
Душмандиз чи убайри.
Хвенай чна кIевидиз
Лезги къилих, лезги тIвар.
Квадар тийиз садрани
Хайи чIалан верцIи зар.
Бубайрилай амукьнай
Чаз уьтквемвал, кьегьалвал.
Зи хайибур, кIанибур,
Хиве кьамир кагьалвал.
Кьегьалвилин крарик
Кутан жуван къуьн чна.
Чи бубайри хвейивал
Чи лезгивал хуьн чна!
Лацу лиф
Иерда кьван вуч я вун,
Я рикI алай лацу лиф.
Гьикьван чIав тир вун такваз,
Зи вил галай, лацу лиф.
Ви лацувал, иервал
Ислягьвилин лишан я.
Ислягьвилер такур эл,
Даим сефил, пашман я.
Пашман тахьуй чи эллер,
Ислягьвилер авачиз.
Такурай чаз дарвилер,
Бахтлувилер гумачиз.
Лув це вуна лацу лиф,
Лезги чилел датIана.
Бахтлу хьурай ватан зи,
Ислягьвилив дигана.
Скачать PDF
Комментарии к статье
Будьте первым кто оставит комментарий к статье.Оставить комментарий