Поэзия | 4(330) 2019
Лезги ва урус чIаларал шиирар кхьизвай, абур мукьвал-мукьвал стихи.ру сайтиниз ва фейсбукда авай вичин профилдиз акъудзавай Meгьамед Мирзоев кьетIен хатI авай шаир я. Ам 1960-йисуз Ахцегь райондин Хуьруьгрин хуьре дидедиз хьана. Ина 8-синиф акьалтlарна Дербентдин педагогикадин училищедиз кьабул хьана. Анаг кьилиз акъудна аскервилиз фена. Алай вахтунда ам Ставрополда яшамиш жезва, ина эцигунрин фирмада кlвалахзава. Шиирар кхьиз 2015-йисалай гатIунна. Москвада адан 5 ктаб чапн хьанва. Алай вахтунда адан 3 ктаб чапдиз гьазур я.
Мегьамед Мирзоев
Салам, Самур
Салам, Самур! Аквазва гьал,
Вун вучиз икI бейгьал хьанва?
Марф къвайила акъудна къал,
И кIвалахни гьалал хьанва.
Чара хьанва багъри миллет,
Вирида ваз гузва къимет,
Тахьай чIавуз къадир, гьуьрмет,
Идакай гил амал хьанва.
Ийизва мад масад батIул,
ЧIалан ахкваз ери, дувул,
Гуьгьуьлар лап ийиз рагъул,
Гил маса къал-макъал хьанва.
Гьар садакай хьанва агъа,
ЧIалан кьилел язух, чагъа,
Ачухуниз сив-къадагъа,
Гил маса гьал-агьвал хьанва.
Пеленгдин хам гьалчна кьилел
Кьифре, чухваз рагъу спел,
Халкьар ийиз чара, кьвечхел,
Валлагь садан ажал хьанва.
ГъалатI хьайдал туп элкъуьриз,
Алакьайтlа беябуриз,
Са кап кьадар гьуьрмет чIуриз
ЧIални къе чаз усал хьанва.
Акьулдилай мез туькьуьл я,
Дерин акьул-дерин гьуьл я,
Хазвайдини чи гуьгьуьл я,
Чаз чи акьул завал хьанва.
Къени рикIер девлет я
Регьимлу кас цавараллай са нур я,
МичIерикай, циферикай азадир.
Инсанвални гьар са касдин абур я,
Михьи рикIив авай чка абадир.
Дугъри инсан вилел жедач алкIана,
Яргъалай хьиз хабар кьада: – ГьикI ава?
Пис хьайитIа сифте ракIар гатана,
Салам гана, къведа гъилел рикI алаз!
Кефияр ви нагьахъвили хайитIа,
– Хата авач, – лугьуда хьи, – гъалатI я.
Са кIус вичин такьат виниз фейитIа,
Гъейрибуруз вич багьа тир савкьат я.
РикIевайди рикI ачухдан – иман я,
Гьар инсандин дугъридал ам ашукь я.
Регьимдизни регьимдайди – инсан я,
Зигьин авайдаз дугъривал талукь я.
Гьуьрмет ая дугъридиз, квез минет я,
Адан кIвал хьуй рикIин са пIипI, гуьлуьшан!
Къени рикIер халкьарин са девлет я.
Руьгь тахьурай чи садрани перишан.
Баркаван я
Кьулан сува шагьвар къекъвез серин я,
Ша, ацукьин ялар ягъиз пIирерал.
Фагьум, фикир, Аллагьди хуьй, дерин я,
Зикридин сес хкаж хьурай синерал.
Вуч лагьайтIан, чун чи дагъдин кIалуб я:
Жуваз цава лув це, кIантIа кIeкIре хьиз.
Мад са кардал, аквазвай, зун тажуб я:
Хуьр такIанди жеда усал кере хьиз.
Яб це дагъви, шагьварди кьур рагариз,
Абурун сес, чи рикIевай са кIус я!
ГъалатI хьана, гьич фимир вун ахвариз:
Тlвар хкажин ватандин-ам намус я!
Кьуд патахъай алтIуш хьанай душманар:
Руьхъведайни къахрагънай чун – лезгияр!
Жуванбурал жува вегьиз буьгьтенар –
Эй келлеяр! Ни гана квез ихтияр?
КIанивал туш,мецеллайди ялтахдин:
Шалта хьиз мез вилик жедач кьегьалдин.
Къалур ийин жуван акьул кIвалахдив:
Вири жен чун иесияр камалдин!
Хъилеривай файдавализ хьайид туш:
Ачух рикIиз,дугъри даим мугьман я!
Игитдин тIвар ялавдани кайид туш:
Кьегьал хциз ялавни баркаван я!
Ялгъуз тар
Кьуьзуь, ялгъуз муьтквер таран
Серинрик зун ацукьна.
Какур хьана,гьал перишан.
Язух къвез зун амукьна.
Кьуд патарив гуьрчек цуьквер
Акайнава, илисна.
Фагъирдинди маса тегьер,
Бижгъер-бижгъер эвисна.
Азаб акур гьар са мугьман
Ашукь я ви тегьердал.
ТIалаб ийиз вавай дарман;
Ви патав къвез кьинерда.
Зикри ийиз гелкъвез-элкъвез,
Хилелай гъил алтадиз,
Сир вуганай за вав кичIез,
Жуван гуьгьуьл абадиз.
Белки зи сир залан я ваз,
Вун вучиз икI сефил я?
Ви тандин сир масан я заз,
Зунни вун хьиз гъафил я.
Эй,уьмуьр! Вал рази муъмин,
Адазни вун тIимил я!
Мад сефер за сир ачухин,
Ам метлебдин асил я.
Уьмуьр фейтIан кесибвиле,
Бул хьайитIан девлетар,
Пехилвилел гъалибвална,
Квадар тийин гьуьрметар.
Скачать PDF
Комментарии к статье
Оставить комментарий