«Самурдиз» талукьарна
Къебеле райондин Дызахлы хуьре газетдин 20 йисан юбилей сувар хьиз къейд авуна "Самур" - 20  |  5(252) 2012      

Кьулан вацIук сел кумай кьван,
Хуьрерик дем, мел кумай кьван,
Руьгьдик милли кьел кумай кьван,
Сагъ я Лезги халкь!


Чи тIвар-ван авай зари Фейзуддин Нагъиеван и цIарар алай йисан 3-майдиз Къебеле ра-йондин Дызахлы хуьруьн Арзулла Регьимован тIварунихъ галай юкьван мектебда тухвай «Самурдин» 20 йисан юбилейдиз талукь мярекатдал лагьанай. Мярекат тухузвай Зейнаб Аслановади ва Магьнур Аллагьвердиевади винидихъ ганвай цIараралди тедбир ачухарайдалай гуьгъуьниз гаф мектебдин муаллим Навруз Бабаеваз гана. «Самурдин» 20 йисан уьмуьрдин рекьикай рахай Навруз муаллимди хайи газетдин юбилей рикIин сидкьидай тебрикна.
Аъа синифра тарс гузвай муаллим Айгуьн Хыдырова дидед чIалакай, ам виридаз кIанарун чарасуз тирдакай рахана.
Лезги чIалан муаллим Айтекин Бабаевади «Самурдин» 20 йисан женгиникай, адан алакьунрикайни агалкьунрикай малумат гана. Газетдихъ гьихьтин четинвилер аватIа лагьана. «Им тек са «Самурдин» сувар ваъ, гьакI вири лезгийрин, вири «Самур» кIанибурун сувар я. Квез и сувар мубарак хьурай!» лагьана Айтекин муаллимди.
Лезги чIалан мад са муаллим - Маариф Регьимовни хайи газетдин таъсиб чIугвазвай ксарикай я. Ада «Самур» тардин мили ванералди тебрикна.
 «Самурдал» рикI алай муаллимрикай Назим Асланова, Фамиле Къедировади, Халисе Мирзали-евади, Рамиз Регьимовани «Самур-дин» коллектив тебрикна, адаз и четин рекье мадни агалкьунар тIалабна.
Ахпа гаф аялриз гана. Абур и мярекатдиз чIехи шанкьунивди гьазур хьанвай. Чепелукьар экуьнал кIватI жедайвал хайи газетдин экуьнал кIватI хьанвай абур: шиир кIелиз, мани лугьуз. Элнура Алиевадини Илагье Хидировади «Самурдиз» талукьарнавай тамашадин чIук вирида гурлу капаралди кьабулна. Кьве къуншиди «Самурдикай» веревирдер ийизвай и сегьнеда къуншийрин сада икI лугьузва:  «Эй лезгияр, чи вилерин экв, рикIерин чим тир «Самур» кхьиз тади къачу! Чи меденият, эдебият, тарих, ацукьун-къарагъун, адетар, чи мел-мехьер гележег несилрал агакьарзавай милли газет кхьиз тади къачу! ИкI лугьуз гьарайиз кIанзава заз, вири лезгийриз ван къведайвал!».
 «Самурдин» экуьнал кIватI хьанвайбурукай Тегьмине Камило-вади, Элназ ва Элзар Ашралиеври, Ферид Эмирасланова, Диана Мирзеевади, Ламийе Хасиевади, Хураман Ягьяевади, Бухсай ва Гуькай Къедироври, Аюб Аюбова дидед чIалал шиирар кIелна. Фираван Байрамлы, Рамиле Рагьманова, Зейнаб Асланова ва Магьнур Аллагьвердиевади лагьай «Перизада» ва «Лезгинкадал илига» манийри залда авайбурун гьиссерал звал гъана.
 «Самурдикай» вичин фикирар, рикIин гафар лагьайбуркай садни Х синифда кIелзавай Семра Аб-дурагьманова я. «Самурди» заз дидед чIал кIанарна. И чIалан иервилелни везинлувилел ашукь хьана зун. И чIалан къадимвал за «Самур-дай» кьатIана. Чи руьгьдин мая тир и чIал вилин нини хьиз хуьн чи буржи тирдини «Самурди» хкана чи рикIел. Чаз - лезгийриз чи дидедин чIал икьван кIанарзавай, ам вилик тухуз алахъзавай лезги милли газетдин - «Самурдин» къадир чир жен! Ам кхьин чна! Жуван чIал ва тарих мадни дериндай чирун патал тадивал ийин чна! 20 йис тамам хьанвай «Самурдин» къелем мадни хциди, ван мадни гурлуди хьурай!» - лагьана Семра Абдурагьмановади.
Лезги чIалан муаллим, чи виридан рикI алай, чаз «Самур» газет кIанарзавай Айтекин Бабаевади мярекатдал лагьай агъадихъ галай шиир къедалди виридан рикIел алама.

Къад йис

Уьмуьрдин 20 йис я, ара датIана,
Хайи чIал кIанариз, хуьз алахъзава.
И чIалан миливал, адан хцивал,
Гележег сихилриз таз алахъзава.

ТIурфанриз, мекьериз на давам гана,
ЧIалаз цIийи нефес, цIийи руьгь гъана,
МичIер яргъалара, муркIарни хана,
РикIериз эквни чим гьиз алахъзава.

ТIвал ягъиз тарихдин атIай гъалариз,
РикI кузва ви хайи халкьдин гьалари,
РикIевай и чIехи, дерин тIалариз,
Шадвални хвешивал гуз алахъзава.

Гьикьван чIехи дердер, тIалар ялда на?
Гьикьван хифетда на, гьикьван тIалда на?
КIанда заз хуш уьмуьр, девран гьалрай на,
Гъам-хифет авачиз физ алахъзавай.

20 йис тамам я ви, тебрикзава за,
Аллагьди авурай ви бахтар юза,
Чир тахьуй ваз хифет, чир тахьуй суза,
На рикIин часпарар хаз алахъзава!

               
Айнур Дашдемирова,

Зейнаб Асланова,
Къебеле райондин Дызахлы хуьр

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
Бубуйрин ник Мурад кьилиз акъатна Уьзейир Гьажибегован лезги дустар “Сувар” приглашает Къафкъаздин сад лагьай музей
Статьи из этой рубрики
«Самур» чи ивидин дамар я Агалкьунрин 20 йис «Самур» гьар хизандиз! Сувариз элкъвей мярекат “Самур” газетдин 20 йис тамам хьана!
ЦIИЙИ ТИЛИТ
№: 8(324)
сентябрь, 2018

Скачать PDF

РУБРИКИ

ПОЛЕЗНОЕ