Жез тахьуй Поэзия | 3(329) 2019
Цуькверив диганва дагъларин ценер,
Ценера цацар гьич гъара жез тахьуй.
КIан я заз ватандин и кьакьан синер,
Садрани адавай чара жез тахьуй.
Гьар инсандин дуьнья сакIа туькIуьда,
Уф гайитIа, гъилевай шем туьхуьда.
Бахт авайдан кIвале эквер куькIуьда,
Аллагь, зи бахт кьакьан тара жез тахьуй.
Хвешивили чи рикIериз чим гъида,
Пакагьан югъ гьикI жедатIа низ чида?
Виняй гуьмир, эхир кьиляй пис жеда,
Ягьанатиз масад гара жез тахьуй.
ЧIал квахьайтIа, душманди чун кьатIда хьи,
Жув атIудай гапур гъиле гьатда хьи.
Пул кткайла кьилевай кас катда хьи,
Акьулдилай зи пул пара жез тахьуй.
Къариб гьикьван элкъвейтIани ракъинихъ,
Эхир са югъ авачиз туш рекьинихъ.
ХкIурайтIа маса касдин гьахъинихъ,
Зи дердиниз, Аллагь, чара жез тахьуй.
Скачать PDF
Комментарии к статье
Будьте первым кто оставит комментарий к статье.Оставить комментарий