Яр алаз Поэзия | 3(329) 2019
Гатфарин рагъ хъуьрезва мад цавара,
Чими нурар хъичирзава чилериз.
ТIебиатни туна вичин навара,
Яран сувар гъанва ада эллериз.
Цуьквед техвер акьалтзава чуьллерал,
Къацу жезва кьиляй-кьилиз там, дере.
Гьейран я зун тIебиатдин мелерал,
КIанивилив дугурзавай и бере.
Лув гузамач аршда чIулав цифери,
Кьакьан цавар элкъвенва мад гуьзгуьдиз.
Яран иер йикъарини йифери,
Хайи чилер хупI кIанарда лезгидиз.
Берекат гуз чи никIерин къацариз,
Чими йикъар алукьзава зар галаз.
Минетда за гьар гатфарихъ гъуцариз,
Хайи халкьдин бахт экуь хуьй яр алаз.
Скачать PDF
Комментарии к статье
Будьте первым кто оставит комментарий к статье.Оставить комментарий