Умун ва хъуьтуьл къилихрин, чина нур авай, хайи халкьдик рикI кудай журналист, хци къелемдин, дерин камалдин иеси тир Агъариза Саидовакай гаф кватайла чи вилерикай гьасятда чина мили хъвер авай, са кьадар хияллу, са кьадар кIевивал ийидай арифдар редактордин образ карагда. Ам гьа икI хьунухь герек я лугьуз фагьумда чна. Вучиз лагьайтIа тIвар-ван авай несилдай я.

      1938-йисуз Ахцегь райондин Къутунхърин хуьре дидедиз хьайи Агъариза Саидов чи машгьур алим Мегьамед эфенди ал Ахтыдин штул я. Мегьамед эфендидин руш вири Къафкъаздиз сейли камалэгьли Шейх Мегьамед Ярагъвидин кайвани тир. Лезгийрин зурба алим ва шаир Алкьвадар Гьасан эфенди гьабурун велед  я. Яратмишунрал рикI алай хизандай тир Агъариза Саидован стха Алирза Саидован тIвар машгьур шаир хьиз эбеди яз халкьдин меце гьатнава. 

      Гьа ихьтин камалэгьлийрин давамчи тир Агъариза муаллимни къелемдив эгечIна. Ростовдин университетдин журна­листикадин факультет акьалтIарай ам 1962-йисуз Дагъустан Республикадин лезги чIалал акъатзавай «Коммунист» газетдин (гилан «Лезги газетдин») редакцияда кIвалахал акъвазна. Корректорвиле, хсуси корреспондентвиле, от­делдин заведишвиле, жавабдар секретарвиле, кьилин редактордин заместителвиле кIвалахай ам 1994-йисуз «Лезги газетдин» редакторвиле тайинарна.

      Агъариза муаллим датIана вичин макъалайра хайи чIал цIалцIамди, регьятди, гьар сад гъавурда акьадайди хьун патал алахъна. Редактор хьайила ада и рехъ давамарна. И кардикай «Редактордин колонка» рубрикадик кваз ада кхьей материалри, жуьреба-жуьре важиблу месэлайрикай тухвай «Элкъвей столри», алимрихъ ва маса ксарихъ галаз тухвай гуьруьшри ва чи халкьдин тарихдай газетда чап авур кьван зурба эсерри шагьидвалзава… 

     Гьа ихьтин зегьметдал гзаф рикI алай инсан тирвиляй, газетдин гьам регьбер, гьамни лежбер тирвиляй, виридаз чешне къалурзавайвиляй адалай 20 йисалай гзаф вахтунда газетдиз регьбервал гуз алакьна. Авайвал лагьайтIа, ада газет марагълуди авун, халкьдиз кIанарун паталди чан эцигна. Редакциядин кIвалахдин жуьре ва къайдаяр цIийи хъувуна. ЦIийи жуьредин – халкьдин ва халкь патал тир, фикирар азаддаказ лугьудай, кIелдайбурухъ галаз абур вири гъавурда гьатдай чIалалди суьгьбетдай жанлу ва метлеблу газет акъудна. Кьилин редактордин алахъунар ва агалкьунар себеб яз газет кхьизвайбур югъ-къандивай пара хьана. А.Саидов редакторвиле тайинардалди газет 4-5 агъзур экземплярдин тираж аваз акъатзавай. Агъариза муаллимди ва коллективди гьакъисагъвилелди чIугур зегьметдин нетижа яз газетдин тираж 11 агъзурдалай алатна.

     КIвалахдай йисара вич «ДАССР-дин культурадин лайихлу кIвалахдарвилин» тIварцIиз лайихлу хьайи, ДАССР-дин Верховный Советдин Гьуьрметдин грамота,  «Зегьметдин тафаватлувиляй» медаль къчур Агъариза муаллимдин 80 йис я. Пенсиядиз экъечIнаватIани ам мадни чи журналистикадин вилик жергейра ава. Хци къелемдин, дерин камалдин иеси тир и кьегьал лезгидалди гьар са лезги журналистди хьиз чнани дамахзава.

     Чна Агъариза муаллимдиз рикIин сидкьидай 80 йисан юбилей тебрикзава, адаз чандин сагъвал ва мадни яргъи уьмуьрар тIалабзава.

 

«САМУР» газетдин редакциядин коллектив