Газета Самур

Руьгьдин муькъвер
ЦIийи ктабар | 7(323) 2018

Чи тIвар-ван авай шаир, публицист ва таржумачи, лезгийрин кьилин газет тир «Лезги газетда» яргъал йисара эдебиятдин отделдиз регьбервал гузвай Мердали Жалилован гьар нубатдин ктаб кIелдайбур патал хъсан савкьват я.

Вичин гьар са макъаладив хьиз, гьар са ктабдивни рикI алаз эгечIзавай и къелемэгьлидин цIийи ктабда ада чара-чара йисара таржума авур дуьньядин ва Дагъустандин халкьарин эдебиятрин бязи векилрин эсерар гьатнава. Абуру санлай халкьарин дуствилин алакъайрихъ дерин дувулар, чIехи тарих авайди субутзава. Эдебиятрин дуствили халкьарин дуствални арадал гъизвайди я лугьузвай М.Жалилова пешекарвилелди авунвай таржумайри лезги чIалахъ чIехи мумкинвилер авайди мад гъилера субутзава.

Халкьдин михьи, хъуьтуьл, руьгьдиз кужумдай чIалал А.С.Пушкинан, М.Ю.Лермонтован, Т.Г.Шевченкодин, М.Е.Салтыков-Щедринан, А.П.Чехован, В.Маяковскидин, С.Маршакан, К.Чуковскидин, С.Михалкован эсерар кIелдай мумкинвал гузвай авторди лезги чIалан вири мумкинвилерикай менфят къачунва.

М.Жалилова Дагъустандин авар, дарги, къумукь, лак, табасаран чIаларай авунвай таржумаярни фикир желбдайбур я. Шаирди урус чIалал кхьизвай са кьадар авторрин шиирарни лезги чIалаз элкъуьрнава.

ЧIехи зегьметдин нетижа тир 375 чиникай туькIуьрнавай и ктаб дидед чIалаз икрам авунин чешне я. Чун чIалахъ я хьи, Мердали Жалилован «Руьгьдин муькъвер» тIвар гана и мукьвара чапдай акъуднавай ктабди лезги чIалан хазина мадни девлетлу ийида, ам кIелдайбурун рикIяй жеда.

«САМУР»