Лам гайи кьиса
Мах  |  6(322) 2018      
     Садра са  кас вичин  лам маса гун патал базардиз фена. Са сят алатна, кьве сят алатна, югъ няни хьана, лам къачудайди хьанач. Са герендилай касдив къуьнел къацу хурлинкI алай са кьуьзек агатна:
     – Гьикьван чIав я за вун вилив хуьз. И лам вавай садани къачудайди туш, ша вуна ам заз багъиша. 
     – Лам маса гана кьве шешел гъуьр кьачуз кIанзавай заз. КIвале сарак кутадай  затIни авач.
     – Ви гъилера гуж, чанда такьат ава. Вуна жуваз са чара аквада.  Зун лагьайтIа, кьуьзуь я, физвай рехъни яргъал. Вуна лам заз ганайтIа за пар  ялдачир, адан далудал эцигдай.
     Язух атана касдиз кьуьзекан. Вичин лам  адаз гана лагьана:
     – Ламраз хъсандиз иесивал ая. Ам ви бакарда акьада. 
     Кас хъфидайла, кьуьзека ам акъвазарна:
     – Вун къени инсан я, тийижир садан чIалахъ хьана адаз хъсанвал авуна. Гьавиляй са хъсанвални за ваз ийин. Зи къуьнеллайди адетдин хурлинкI туш.  Гьида таб рахайтIа, ада ваз хабар гуда. Яхъ ам жуван къуьнел, хъвач кIвализ. Амай кIвалахар дуьз жедайди я. 
     Касди кьуьзуьда лагьайвал авуна. Йиф алукьнавай. Яргъи къуз кIвачел хьайи кас гишила гъилерай фенвай. Вичин са хванахвадин кIвалин патавай алатдайла рад ртал элкъвезвай касди кIвалин рак гатана. 
     – Вуж  я и чIавуз атанвайди? – жузуна к1валин иесиди.
     – Я хванахва, ваз зун чир хьаначни?  Рехъ фена галатнава зун. Са геренда ял ягъиз  кIанзава.  
     Хванахвади рак ахъайна. 
     – Вуна хурлинкI вучиз къуьнел кьунва? – жузуна кIвалин иесиди.
     – Ам адетдин хурлинкI туш, таб рахазвайбурун къалум я. 
     Адан гафарин чIалахъ тахьай кIвалин иеси ван алаз хъуьрена. 
     Каша касдиз тади гузвай. Вичиз ина недай затI тагудайдан гъавурда акьурла ада регъуьвал рикIелай алудна лагьана:
     – Са кап фуни са гъвел ниси хьанайта недай за. 
     – Эхь, хъсан жедай. Ингье чи хьра фу чразмач, калини нек гузмач. Гишила ахварай нисинихъ къарагъзвайди я чун. 
     И гафар ван хьайила хурлинкIди вичин шуькIуь тум юзурна касдин япал са вуч ятIани кушкушна. 
     – Вуна таб рахазва гьа, хванахва! Ада зи япал лагьана хьи, куь кIваляй цикIендин ни къвезва. 
     КIвалин иесидиз гьекь акъатна:
     – Чна къе цикIен чранвай, ингье тIуьна куьтягна. 
     ХурлинкIди касдиз мад вуч ятIани  лагьана. 
     – ХурлинкIди шкьакьвал мийир, хьран къене чуьнуьхарнавай цикIендикай са кIус це лугьузва. 
     И гафар ван хьайи  кIвалин иесидин  рангар атIана. Ада цикIен гъана суфрадал эцигна. Са кIус тIуьна кефияр къумбар хьайи касди лагьана:
     – Я хванахва, вун чиниз илифайла зи къариди чаз чрай афарар рикIел аламани? Гьабурукай кIандай исятда, патавни къайи тугъ. 
     – Эхь, хьанайтIа зани недай.
     ХурлинкIди  мадни касдин япал кушкушна. КIвалин иесидиз килигна касди лагьана: 
     – Вун вучиз таб рахазва? Афарар дакIардал, синийрин кьулухъ чуьнуьхарнава лугьузва хурлинкIди.  
     Гила абурун вилик афарарни къайи тугъ атана. КичIела лугьудай гаф жагъин тийиз амай кIвалин иеси мугьманар мус хъфидатIа лугьуз кIвач  алтадиз авай. 
     ТIуьна-хъвана кефияр къумбар хьайила кас хъфиз гьазур хьана.  Им акур кIвалин иесиди хвешила лагьана: 
     – Са верч кьванни авач хьи, рекье недайвал вав вугун. 
     ХурлинкIди мад касдин япал кушкушна. Касди вичин шкьакь хванахвадиз килигна лагьана:
     – ХурлинкIди   заз лугьузва хьи, вуна къуншидин салай чуьнуьхай верч чрана тунва. Ада фена вичи къун­шидиз хабар гуда лугьузва. 
     Къуншиди вичиз дуван кьуникай кичIе хьайи кIвалин иесиди касдиз минетна:
     – Вуч кIандатIани ая, анжах къуншидиз хабар гумир. За ваз кьве шешел гъуьрни гуда, абур ялдай са ламни. 
     – Вуна лагьайвал хьурай, хванахва. Пара кьван сагърай вун. Чи патариз атайтIа чи к1вализни илиф, – лагьана шешелар ламран далудал вегьена хъфе­на кас вичин кIвализ. 
     Гьа икI, ада кьуьзуьдаз авур хъсанвал вичихъ  хтана. Шкьакь хванахвади лагьайтIа, гьа йикъалай таб рахунилай гъил къачуна.
 
АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Сулейманан чIехи тIвар По следам предков Камарван Халкьдин дамах тир шаир
Статьи из этой рубрики
Хъсанвилиз писвал Жив такур гъед Гатфар ЦIийи рагъ Хъсан дуст
ЦIИЙИ ТИЛИТ
№: 7(352)
октябрь, 2021

Скачать PDF

РУБРИКИ
Шаирар
"Самур" - 30
Люди и судьбы
Yubiley
Чи къагьриманар
Tarixin izi ilə
Gəncliyimiz – qürurumuz
Müsahibə
Dünya ləzgiləri
Яран сувар
Diqqət: İnsan taleyi!
İnam və iman
Спасём планету
Qarabağ müharibəsi
Редакциядин дустар
Редактордин гаф
Дагъустан
Диктант
Чи кьегьалар
Чи классикар
"Самур" - 20
Мах
И чил хайи диге я
Жеч гьа!..
Dağıstan xalqları
ЦIийи ктабар
Milli Məclisə məktub
Языки мира
Марагълу инсанар
Redaksiyaya məktub
Лезги чIалан месэлаяр
Известные лезгины
Новости Россотрудничества
Добрые вести
Квез чидани?
Юбилей
Лезгияр вирина
SOS!!!
Известные лезгиноведы
С верой в душе
"Самурдин мектеб"
Мораль
Чи адетар
Məşhur ləzgilər
Чи хуьрер
Новости на все голоса
Известные кавказоведы
Хъсан хабарар
Чи адетар
Yeniliklər
Алимрин веревирдер
Чакай кхьенай ...
Чешне къачу!
Çıxışlarımızın əks-sədası
Ша, лезги чIалал рахан!
Эпитафия
Барка
Хабарар
Харусенят
Поэзия
Этнография
Тарихдин геле аваз
Дагестан
Народы мира
Спорт
Инсанар, кьисметар
Редакциядиз чар
Чир-течир
Yeni kitablar
Фольклор
Дайджест
Чи сейлибур
Чи тавдин кIвал

ПОЛЕЗНОЕ