Женгера цIийи агалкьунар гъилик авуна вичин имамат гьегьеншарзавай Шамилан бязи наибри и агалкьунрикай масакIа менфят къачуз гатIунна. Абуру хуьрерин агьалияр тарашиз мал-девлет кIватIунихъ ялзавай. Гьа и крар дагъвийрин наразивилериз себеб жезвай. Ингье гьикьван шикаятар авуртIани, абурун арзаяр Имам Шамилал агакьзавачир, вучиз лагьайтIа наибри манийвал ийизвай. Эхирни машгьур лезги алим, шаир ва лукьман, Шамилан кьушунрихъ галаз кьиле фейи дявейра дагъвияр хьиз, чпел залан хирер хьайи урус аскерарни сагъар хъувур Мирза Али эфенди ал-Ахтыди арабдалди шиирар кхьиз наибар русвагьна. И кардикай хъел атай наибри 1848-йисан сентябрдиз шаир кьуна дустагъ авуна.

     Шамилаз и крарикай хабар авачир лугьуда. Гьавиляй Мирза Али эфенди са йисуз дустагъда амукьна. Ина хьайи вахтунда ада наибрин чапхунчивилерикай «Диван» арадиз гъана. И гъилин хатIарин ктабда гьатнавай шиирар вири Дагъустанда сиверай-сивиз фена ва Шамилавни агакьна. Ада шаирди кхьенвайбур кIелайдалай ва вичин куьмекчийри гайи малуматар тупIалай авурдалай кьулухъ Мирза Али гьахълу тирди кьатIана ва ам дустагъдай ахъайна.

     Кьегьал ахцегьви имамдин кьилив гъайила Шамила вичин бязи наибри гьакъикъатдани гьахъсузвилер ийизвайди, шаир гьахълу тирди хиве кьуна. Шамила завай вуч кIандатIа тIалаб ая лагьайла, Мирза Али эфендидиз адавай затIни кIан хьанач. ГьакI ятIани Шамила вичин 77 яшар хьанвай шаирдиз 17 йиса авай са иер рушахъ галаз хизан туькIуьрдай ихтияр гана. Мирза Алиди вичиз гайи ихтиярдикай менфят къачунач. Ада гьа иер рушаз 17 шиир теснифна. А шиирар мецера гьатна.

 

Шакир АЛИХАНОВ