Алай йисан 30-июндиз Да­гъус­тан Респуб­ли­кадин къадим Ах­­цегь шегьерда 19 лагьай гъилера Шар­вилидин су­вар кьиле фида. Чи тIвар-ван авай ва­танэгьли Имам Яралиеван теклифдалди ва адан регь­бервилик кваз кардик кутур и зурба мярекат лезги халкьдин сувариз элкъвенва ва Дагъустандин къеце патазни сейли хьанва.

     Сувар гурлуз кьиле тухун патал Ахцегьа гьазурвилер аквазва. Виликан вахтара хьиз гилани мугьманар хъсандиз кьабулунихъ, мярекатдин программа кутугайди хьунухъ ялзава. И гъилерани мярекатдиз атанвайбур «КIелед хивез» акьахда. Ахпа Валентин Эмирован тIварунихъ галай багъда митинг ва концерт кьиле фида. Ахцегьин музейдини гьа юкъуз вичин ракIарар мугьманриз ачухарда. Майдандал гъилин кIвалахрин, музейдин экспонатрин выставкаяр тешкилда. Дагъустандин чара-чара районрай, гьaкIни къецепатан уьл­квейрай атай мугьманар патал къулай шартIар арадал гъида.