Чи аямдин СтIал Сулейман
Барка  |  4(320) 2018      
     Халкьдин поэзиядал гзаф рикI алай, вичихъ ргазвай ил­гьам авай, шиирар хуралай кIелдай, гьар са дуьшуьшдиз, гьар са вакъиадиз гьасятда чIалар туькIуьрдай алакьунрин иеси яз садбуру вичиз «Чи аямдин СтIал Сулейман» лугьузвай, чи халкьдин рикI алай шаир Сажидин Саиджамалан хва Саидгьасанова и йикъара вичин 85 йисан юбилей къейд авуна.  Авайвал лагьайтIа, «85 йис» гафар адав къвезвач. Акунрайни, къилихрайни викIегь кас яз, лезги медениятда, шииратда вичин кьетIен чка кьунвай, чIалан гьуьжетунра гзаф­бур галудиз алакьдай, гъиле датIана къелем авай Сажидин муаллим рикIин экв чиниз хъичирнавайбурукай я.
     С.Саидгьасанов 1933-йисан 2-май­диз СтIал Сулейманан райондин  Агъа Стlалрин хуьре дидедиз хьана. Хайи хуьре юкьван мектеб акьалтIарай жегьил кьисметди Туьркменистандиз акъудна. Мары шегьерда хуьруьн майишатдин училище куьтягьна, кьве йисуз гьана кIвалахна. 
     Ватандиз хтай Сажидина кIва­лахиз-кIвалахиз Буйнакск шегьердин хуьруьн майишатдин техникумни куь­тягьна, чара-чара къуллугъар кьи­лиз акъудна.
Ингье хайи чlалаз, лезги поэзиядиз  адан рикIе ахьтин кIанивал авай хьи, эхирни В.И. Ленинан тlварунихъ галай университетдин Дагъустандин чIаларин факультетдик экечIна. Инаг акьалтIарна  1974-йисуз хайи хуьруьн юкьван мектебда муаллимвиле кIва­лахал акъвазна. Муаллимринни аял­рин рикI алай дустуниз элкъвей С.Са­идгьасанова арадиз гъайи «Чешме» тlвар алай эдебиятдин  кIватIал ви­ринриз сейли хьана. И кIватIалди 25 йисан къене халкьдин тарих, меденият ва эдебият чируник зурба пай кутуна. 
     Сажидин Саидгьасанован къе­лем­дикай цlудралди шииррин, гьикаятдин, тарихдин ктабар хкатна. Адан «Вун накь вучиз атаначир?», «КIватIи-КІватІаш», «Аламатар», «Ни гуда заз жавабар», «Зуьрнедин ван алаз», «Ри­ваятрин камари», «Шииратдин яла­вар», «Зи СтIал Сулейман», «Куьн патал, чан аялар», «Ярагъви ашукь Уьзден» ктабар, «НуькI хала» пьеса, гзафни-гзаф публицистикадин, тарихдин макъалаяр гъилерай-гъилериз физва. 1996-йисуз адаз «Дагъустан Республикадин ме­дениятдин лайихлу кIвалахдар» гьуьр­метдин тlвар гана. 
     Сажидин муаллимдин гзаф ши­ирар манийриз элкъвенва. Адан чlа­лариз Сейфуллагь Керимов, Зейнал Гьа­жиев, Мегьамед Гьуьсейнов, Омар Аюбов, Маина Абдулмуталибова, Къагь­риман Ибрагьимов хьтин ком­позиторри макьамар туькIуьрнава. Адан манияр Ризабала Агъабалаев, Тар­лан Мамедов, Даниял Къазиев, Ро­за Магьсумова хьтин маничийри тамамарзава. 
     Къени къилихрин умун инсан тир агъсакъал шаирдин юбилей рикIин сид­кьидай мубаракзава чна, адаз шииратда генани чIехи агалкьунар тIалабзава. 
Вун датIана илгьамдин балкIандал алаз хьурай, ви балкIан садрани галат тавурай, ви къелем садрани къуьруь тахьурай, чи рикI алай Сажидин муаллим! Вуч хъсан я хьи, чи халкьдихъ вун хьтин къелемэгьлияр ава!
 
Седакъет КЕРИМОВА

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
КцIар райондин Мучугъ хуьр Ləzgi çörəyi Мучугъ Bakıya köməyə gələn ləzgilər Навахо непобеждённый
Статьи из этой рубрики
Аваз хьурай "Лезги газет"! Халкьдиз бахш авур уьмуьр Cедакъет Керимова - 60 «Сувар»у скоро 20 лет РикIелай тефир мярекат
ЦIИЙИ ТИЛИТ

РУБРИКИ

ПОЛЕЗНОЕ