Лугьуз тахьай гафар
Редакциядиз чар  |  3(319) 2018      
     Алай йисан 29-мартдиз С.Керимовадин  Бакудин Музыкадин Академиядин Опе­радин Студияда кьиле фейи юбилейдин мярекатдилай гуьгъуьниз “Самур” газетдин редакциядиз кIелдайбурулай гзаф чарар атана. Агъадихъ чна абурукай кьвед чапзава.
 
     Седакъет Ке­ри­мова вичин агал­кьунрин шеледа гьар жуьредин няметар авай надир инсанрикай я. Ада ийизвай крар – шиирар, гьикаяяр, повестар, романар, тарихдин, эдебиятдин ва маса хилерай макъалаяр кхьин, лезги халкьдин уьмуьрдикай, иер мублагь маканрикай филмаяр лентиниз къачун, лезги маниярни кьуьлер кьакьан дережада аваз жемятдал агакьардай “Сувар” ансамбль  туьк1уьрун ва адаз регьбервал гун, вири лезги пресса паталди манар тир “Самур” газет яргъал йисара чал агакьарун, Кц1арикай энциклопедия кхьена акъудун, лезги-азербайжан га­фар­ган акъудун, дигай хизанда гьа­­­ми­ша къулан чим, ч1а­лан аваз, веледрин шад хъвер хуьн, к1ва­лин иесдин къул­лугъда акъвазун... – ибур вири са касдин гьунарар я. 
     Эгер маса са касди и крарикай анжах са кар кьванни кьилиз акъуднайт1а, адаз вирида баркалла лугьудай. Бес и вири крар ийизвай инсандиз шумуд баркалла къвезва?! Кьец1ибуру кьуьлер чирдай, буьркьуьбуру рекьер къалурдай, сефигьри камалэгьлийриз къиметар гудай девирда и кьегьал дишегьлиди кисна халкьдиз герек жавагьирар арадал гъизва. Им зурба кьегьалвал я. 
     Мадни кьакьан агалкьунар хьурай, Седакъет вах! Вахъ, ви хазандихъ мягькем сагъвал, уьмуьрдин генгвални мублагьвал хьурай! Къелем хци яз, гьамиша багърияр, дустар, лезги халкь шадардай агалкьунар хьурай!
 
Фейзудин НАГЪИЕВ, 
филологиядин илимрин доктор, шаир Магьачкъала шегьер
 
  ***
 
     Играми  Седакъет вах! Квез ва куьн кIани вири инсанриз  куьн дидеди хайи югъ мубарак хьурай!    Куьн  Аллагьди хуьрай, чи халкьдиз пара  такурай.  Куьн йисариз муьтIуьгъ  тахьана, фагьумда     уьмуьрдин  акунарни-кьатIунар  аваз,   пIузаррал  уьмуьрдин  верц1и тIеамрин   хъвер алаз, чина хайи  чилни хайи  чIал, хайи элни инсаният  кIани хьунухьун  нур аваз хьурай.   Кун хьтин инсанрихъ  авур крарилай  хъувуна кIанзамай  крар гзаф жезвайди я.  Квез гьа крар кьилиз акъуддай чандин сагъвал, къуватар-такьатар  тIалабзава за.  
     Музыкадин Академиядин  рикIиз чими залда  куь  юбилейдиз  талукьарнавай  няниз  атанвай  инсанриз  килигиз фикирзавай за: Гьар са инсандивай  халкьдин патай икьван кIанивални гьуьрмет  къазанмишиз  жезвайди туш.  Сегьне  ацIай къужах-къужах цуькверин кIунчIар, инсанри квез  лугьузвай  кIанивилин  мили гафар  (залда ацукьнавай гьар са касдиз ихьтин гафар лугьуз кIанзавай)  халкьдиз  вичин зари тават гзафни-гзаф  кIан хьунин лишан тир. И карди куьн  асул халкьдин  шаир  тирди субутзавачни?  
     Азербайджандин  тIвар-ван авай журналистрикай тир Флора Хелилзадеди квез халкьдин шаир гьуьрметдин тIвар гана кIанзавайди я лагьай гафариз куьне хъсандиз жаваб гана: «Халкьдин кIанивал чIехи тIварарилай гзаф вине ава».  Зи фикирдалди,  куьн  фадлай  халкьдин  шаир я. 
Няни пара хъсандиз кьиле фена. Мярекатдин эхирда  инсанар куь кьилив  чIижер виртIедин куьнуьдал хьиз кIватI хьанвай. Абуруз килигиз, «Куьн хьтин  велед  дуьнядиз бахш авур дидедин руьгьни  шад хьурай», -лагьана за.        
ЧIехи гьуьрметдив ва кIанивилив  куьне стха яз гьисабзавай
 
Бегьрам ЗАЛОВ, 
Худат шегьер 
 
***
     
     Салам, Седакъет ханум! Накь чун куь юбилейдин мярекатда авай. Гзаф зурба мярекат тир. Анжах вахт тIимил тирвиляй чал гаф гьалтнач. Гьавиляй геж хьайитIани чаз чи рикIин гафар агакьариз кIанзава. Квез Аллагьди чандин сагъвал, яргъи уьмуьр гурай хьи, квевай гьич тахьайтIа жув хьтин алакьунар авай кьве  шаир вердишарна агакьариз жедайвал. Чун мад гъилера гъавурда акьуна хьи, накьанан хьтин мярекатар квелай пара чаз герек я.
     Седакъет Керимовадивай накьанан юкъуз Бакудин са хъсан ресторанда вичин цIуд-цIувад мукьва-кьилидихъ галаз ацукьна ял ягъиз жедай. Ингье а чIавуз ам Седакъет ваъ, са маса кас жедай. Урусриз хъсан мисал ава: Са касни вичин ватанда пайгъамбар жедач.
     Чна Пушкинар, Есенинар, Туьтчевар, Блокар кIелда, абурун шиирар хуралай чирда ва и кардалди дамахда. Анжах вучиз ятIани жуван тIал чIугвазвай, жувахъ галаз са гьавадив нефес къачузвай, жувахъ галаз са булахдай яд хъвазвай жуван шаирдин са цIар кIелиз кIан жедач. Куьне куь ктабар куь рикI хьиз ахъайна чав вуганва. Чаз мадни жуваз азият гана абур кIелиз кIандач. Шаирдин виридалайни чIехи бахтлувал адахъ вичи кхьейбур рикIяй кIелдайбур гзаф хьунухь я. Куь рикI чаз, чи халкьдиз ахъа я. Чи рикIериз лагьайтIа, биши къванериз хьиз, куьне лагьай гафар ван къвезвач. ЯтIани, Седакъет ханум, куьн садрани гуьгьдай аватмир. Чир хьухь хьи, чи халкьдихъ куьн рикIяй кIани, куь шиирралди дамахзавай чун хьтин ксар гзаф ава.
 
Азим БАБАЕВ,
Къорхмаз ХАЗАРОВ,
Сумгаит шегьер

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
КцIар райондин Яргун хуьр Лезги чIалан мярекат Вечер улыбок и цветов Гуьзел муаллим Яран сувар
Статьи из этой рубрики
Маршалдин чар Хайи чIалан къадир хьуьх Кьурагь дередин тават Вириниз сейли хьанва Жуввал гьикI хуьда?
ЦIИЙИ ТИЛИТ
№: 3(319)
апрель, 2018

Скачать PDF

РУБРИКИ

ПОЛЕЗНОЕ