Пуд дуст
Мах  |  1(317) 2018      
     Гад алукьнавай. Гьайванри, пепейри, нуькIери чпиз рагъ гузвай. Тараризни гзаф хвешизвай.  Ракъинихъ абурун пешер къап къацу жезвай.
     Цавун юкьни-юкьвал  Ракъини вичиз муг авунвай. Экуьнахъ ам мукай экъечIзавай, нянихъ чуьньх хъжезвай.  
     Цавун а кьиле мад са хизан авай.  И хизандин буба ЦIайлапан, диде Гугрум, чIехи стха Гар, гъвечIи стха Циф тир.   
     Къарилай са къуз Циф  Ракъинин кьилив фена:
     – Я Рагъ, заз марфадиз элкъвена чилерал авахьиз кIанзава, жуван чка зав вугуз жедани вавай?
     – Вав кугъвадай мажал авани? За виридаз гьикI хвеши ийизватIа аквазвачни ваз?
     Циф пIузарар куьрсарна хъфена. Са шумуд йикъалай ам мад Ракъинин кьилив хтана:
     – Заз марфадиз элкъвез кIан я, зал нубат мус къведа? 
     Ракъини хъел кваз:
     – Вучда ви марфадикай? Чил цIийиз кьуразва, ам мад кьежирдани? – лагьана чукурна Циф.  Циф къвердавай залан жезвай. Ракъини лагьайтIа, чил-цав алугарзавай. ТIебиатдин виликан кIубанвиликай гелни амачир. Гьайванар, къушар, пепеяр ра­къи­никай катиз гьарма сана чуьнуьх жезвай. Хъвадай яд жагъин тийиз абур гьалдай фенвай. ВацIар, вирер, хулар кьуразвай.
     ДакIуна чIехи хьанвай Циф мад атана Ракъинин кьилив:
     – Вуна вири кана чIухзава. Марф къун тавуртIа абур рекьида. Акъваз са къерехдик, гила нубат зиди я. 
     Ингье рагъ сакIани  рекьиз гъиз жезвачир:
     – Гатуз ракъини кудайд я ман. Кьуьд акъатдалди ракъинихъ цIигелбуруз гила зун такIан хьанани? 
     Чара гьар патахъай атIай Цифедиз и гъилера вичин хизандивай куьмек кIан хьана.  Садлагьана цавари гугрумна, кIеви гар къарагъна, чIулав цифер акьалтнавай цава цIайлапанар къугъвана. Кьуранвай чилел юргъ къва­на.  И гугрум-пахърахъдикай чан­­да кичI гьатай Рагъ чуьнуьх хьа­на.   
     Марф  къунивай тIебиат акваз-акваз кIвачел акьалтзавай. Цихъ къаних хьанвай гьайванри шуршур ийиз алахьзавай ятар хъваз хвешила кьуьлерзавай. Гъетери хвешила вацIарай, вирерай кьил хкудна марфадиз алхишарзавай. И кар акур Ракъинин рангар къекъифна. “Чимивилерни мадардив хъсан я кьван”, – фикирна ада. Пашман хьана гевилар  къачун патал ам Цифедив агатна. Вичин гъалатI хиве кьуна, идалай кьулухъ нубатдиз амал ийида лагьана адаз гаф гана.    Къвана кьезил хьанвай Цифедин хъел лагьайта, михьиз элекьнавай. 
     Садлагьана Ракъининни Цифедин вилик ирид рангунин лугьуз тежедай хьтин иер са муьгъ  акъатна. 
     – Им вучтин иервал я? Вун вуж я? – жузуна кьведани санал.
     – Зун Хважамжам я. Рагъни марф санал хьайила цавариз илифзавайд я зун. 
     Гьа чIавалай Рагъ, Циф ва Хважамжам кIеви дустар хьана. Гьар марф алахьна рагъ акъатайла цавуз Хважамжам илифда. 
 
 АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Дидед чIалахъ гьикI гелкъвен? Жегьил алимдин агалкьунар Гьамзат ЦIадасади СтIал Сулейманаз бахшай эсерар O qəmli sevinc
Статьи из этой рубрики
Гатфар Жив такур гъед Хъсанвилиз писвал Лекьни пехъ Хъалхъас баде
ЦIИЙИ ТИЛИТ
№: 8(324)
сентябрь, 2018

Скачать PDF

РУБРИКИ

ПОЛЕЗНОЕ