ЧIехи камалэгьли чи арада амач
Эпитафия  |  11(316) 2017      
     Алай йисан 18-декабрдиз ван хьайи залан хабарди чи рикIер къарсурна. Алай аямдин прикладной ва монументальный живописдин зурба сеняткаррикай сад, вичин эсерриз гьиссерин деринвал, фикиррин азадвал, философиядин фагьумар хас тир Дарвин Велибегов чавай къакъатна. Чи чIехи камалэгьли, зурба ватанперес, къени къилихрин инсан гьахъ дуьньядиз рекье гьатна. «Самур» газетдин кIвалахдарриз и къакъатуни иллаки кIевелай таъсирна. Вучиз лагьайтIа абуру газетдин чинриз чи художникдикай шумудни са очеркар акъуднай, и зегьметдал рикI алай, вичихъ чIехи агалкьунар авай касдикай вири халкьдиз гегьеншдиз чирвилер ганай.  
     Дарвин Гьажибеган хва Велибегов 1941-йисан 12-январдиз Дагъустандин Ахцегь райондин Чепер хуьре дидедиз хьана. I0 йисуз ина, 3 йисуз Новочеркасскда, 10 йисуз Грозныйда, 10 йисуз Ленинградда, 4 йисуз Магьачкъалада яшамиш хьайи сеняткарди В.Мухинадин тIварунихъ галай вини дережадин мектеб (гилан академия) акьалтIарна. 1976-йисуз Дагьустандин ва СССР-дин Художникрин Союзрик экечIай ам гьа йисуз Бакудиз куьч хьанай ва 1980-йисалай Азербайжандин Художникрин Союздик квай.
     Вичин эсерар Азербайжандин, Россиядин, Украинадин, АСШ-дин, Туьркиядин, Германиядин, Франциядин, Австриядин, Израилдин, Норвегиядин, Япониядин, Италиядин, Англиядин, Польшадин, Словениядин ва маса уьлквейрин музейра тунвай, гьакIни чара-чара ксари чпин коллекцийра хуьзвай Дарвин 1000-далай гзаф эсеррин автор я. Адан «Лацу дурнаяр» монументальный гуьмбетди 1984-йисуз Дагьустан Республикадин гьукуматди кьиле тухвай конкурсда сад лагьай чка кьуна. 1989-йисуз виридуьньядин ктабрин ярмаркада сад лагьай чка кьур «Азербайжандин Яру ктаб»да Д.Велибегова чIугунвай 150 шикил гьатнава. 
     Адан пейзажрай Азербайжандинни Дагъустандин цуькверив диганвай яйлахар, кьилел жив алай дагълар, кьакьан чарчарар чиниз хъуьреда. 
     Эхиримжи йисара Дарвина лингвистди хьиз лезги чIалан  месэлайрин винелни кIвалахнай. Адан илимдин макъалаяр мукьвал-мукьвал газетринни журналрин чинриз акъатнай. Лезги чIал дуьньядин дегь чIаларикай тирди субутун патал чи камалэгьлиди Къафкъаздин расадин халкьарин чIаларин чирвилерин сиягь туькIуьрнай. И кардиз ада зурба зегьметар, вичин уьмуьрдин са шумуд йис серф авунай. Ина 1700 халкьдин тIварар гьатнава. 
     Дарвинакай Азербайжандин ва Гуржистандин телевиденийри кьилди фильмар чIугунай. Ам «Къафкъаз-Греция. Медениятрин умумивал» ва « Къафкъаз-Скандинавия. Медениятрин умумивал» ктабрин автор я.
     Дарвин Велибегов лугьуз тежедай хьтин заха инсан тир. Вичин эсерар коллекционерри багьа къиметдай къачузвай и касди чи халкьдин интеллигенциядин векилриз абур рикIин сидкьидай багъишдай.  Вичиз Аллагьди чIехи алакьунар хьиз умунвал, саявални ганвай, вичин халкьдал кьару тир, датIана адал дамахдай и инсандин экуь къамат ам чидайбурун рикIера гьамишалух яз амукьда. Аллагьди рагьмет авурай! 
 
“САМУР” газетдин коллектив

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я ЦIийи йис дидед чIалан йис хьурай! С 20-летием, “Оки”! Лезги фольклордин няни “Гьажи Давуд” ктабдикай веревирдер
Статьи из этой рубрики
Хожалыдин сед РикIелай тефир камалэгьли Кьакьанрихъ ялна Bağışla bizi, Çingiz! Хожалыдин тIал
ЦIИЙИ ТИЛИТ

РУБРИКИ

ПОЛЕЗНОЕ