ЦIийи йис дидед чIалан йис хьурай!
Лезги чIалан месэлаяр  |  11(316) 2017      
     Квез и чIаван хийирар, чан жуванбур! 2017-йис тарихдиз элкъвезвай хьиз, виликай къвезмай 2018-йисани чахъ умудар кутазва. Чи халкьдин гьалар мадни хъсанарун, чи чIал, меденият, ацукьун-къарагъун мад­ни хъсандиз хуьн патал чна ви­ри­да датIана алахъунар авуна кIанзава. Жуван къени краралди чун Шарвилидин, Гьажи Давудан, Етим Эминан, СтIал Сулейманан хтулар тирди субутна кIанзава.
     Играми ватанэгьлияр! Ша чна виликай къвезмай йис чи халкь патал, дуьньядин лезгияр па­тал дидед чIал хуьнин, адаз ик­рам авунин йисаз элкъуьрин! 2018-йисуз чун лезги чIалав генани кIа­нивилелди, таъсиб чIугуналди, къа­дирлудаказ, хайи дидедив эгечI­дайвал эгечIин. Адан вилик жу­ван жавабдарвал рикIелай ракъур ти­йин. Чи кваз такьунар себеб яз гъи­лерай физвай лезги чIал чIур хьуниз рехъ тагун. Лезги чIал багьаз кьаз, адал дамахиз чирин чна. Аявалин дидед чIалаз! Чакай чун ийизвайди, чахъ лезгивилин руьгь кутазвайди, чаз жуввал бахшзавайди чи чIал тирди хъсандиз рикIел хуьн. ЧIа­ла­кай чIал ийизвайди тек чан-рикI авунар туш, ам хуьн паталди кье­тIен крарни кьиле тухун герек я. СтIал Сулейманан районда  и рекьяй тухузвай къени крар чаз виридаз чешне я. Районда дидед чIал чирун ва гегьеншарун патал кьилди программа кардик кутунва. И программадив кьадайвал, гила бахчайра, мектебра, идарайра вири мярекатар дидед чIалал тухузва. Районди лезги чIал хуьниз эвер гузвай баннеррикай гегьеншдиз менфят къачузва. Гьайиф хьи, чи муькуь лезги районри ихьтин крарилай чешне къачузвач. ЦIи­йи йисуз дидед чIал хуьнин жаваб­дарвал чIехи къуллугърал алай чи ватанэгьлийрилай гатIунна гьар са лезгидин мефтIеда гьатун тIа­лабзава чна. 
     Чан жуванбур! Квез цIийи йис му­барак хьурай! Алукьзавай йис куьн паталди гьакъисагъвилелди зегь­мет чIугунин, чIехи агал­кьун­рин, кIанивилин, мел-ме­хъеррин, бахтлувилин йис хьурай! Куь кIвалериз, хизанриз шадвилер, бахт­лувилер илифрай!
     ЦIийи йис - цIийи мурадар, цIийи агалкьунар лагьай чIал я. Куь мурадрин шив садрани галат тавурай! Куьн хайибурун, кIани дустарин кьула аваз хьурай! Квез чандин сагъвал, рикIин шадвал, руьгь­дин кьакьанвал тIалабзава чна. Кутуграй квез цIийи йис!
 
“САМУР”

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я С 20-летием, “Оки”! Лезги фольклордин няни “Гьажи Давуд” ктабдикай веревирдер Масдардиз мукьва гафар
Статьи из этой рубрики
Лезги чIалан гьалар гьикI я? Дидед чIалахъ гьикI гелкъвен? ЧIалаз икрам ийин Лезги чIал гьикI хуьн? ЧIехи гафарган
ЦIИЙИ ТИЛИТ
№: 7(323)
август, 2018

Скачать PDF

РУБРИКИ

ПОЛЕЗНОЕ