Лезгияр вирина  |  4(251) 2012      

Ватандивай яргъа яшамиш жезвай чи ватанэгьлийрин хъсан суракьар ван хьайила лувар акатда чахъ. Чпин алакьунралди чешнелу жезвай и инсанри хайи халкь вириниз сейли авуни чахъ руьгь кутада.
И мукьвара гьа ихьтин са инсандал дуьшуьш хьана чун. 1970 - йисалай Одессада яшамиш жезвай, инин тIвар-ван авай ксарикай тир, яргъал йисара гьуьлерал хьайи Магьсим Ибадулла-гьан хва Магьсимакай я чи ихтилат. Гьуьлеллайбуруз хас тир са кьетIен жуьредин акунар авай и касдин ракъини канвай, хъвер авай чин акурла ам шаирдин рикI авай инсан тирди кьатIун четин туш. Дуьньядин 94 уьлкведа хайи, вири океанрани гьуьлера сирнавай инсандихъ шаирдин рикI тахьун мумкин яни? Кьуьд-гад талана, ара датIана жуьреба - жуьре гимийра аваз гьуьлерал хьайи адан уьмуьрдин рекьикай ихтилатар чIехи са ктабдани гьакьдач.
2006 - йисалай инихъ ада гзафни-гзаф жавабдар къуллугъ кьилиз акъудзава. Ам дуьньядин зурба гьуьлерин агентствойрикай тир Грециядин « NAVIGATOR SA »- дин суперинтендант я. Суперинтендант- гьуьлуьз акъатзавай гимийрин гьалариз, абурун документациядиз гуьзчивал ийизвай жавабдар инженер я. Ада разивал тагайтIа, са гимидивайни гьуьлуьз акъатиз жедач. Гимидин капитанни гьадаз табий я.
Магьсим 1947-йи-суз КцIар райондин Хьилерин хуьре дидедиз хьана. Хуьре юкьван мектеб акьалтIарай ам 1965 - йисуз Бакудин гьуьлерал къекъуьнин училищедик экечIна. Ина вад йисуз чирвилер къачур жегьил 1970 - йисуз Одессада вини дережадин инженервилин училищедиз кьабул хьана. 1975 - йисуз инаг куьтягьай ам Гуржистандин пароходрин идарада кIвалахал акъвазна.1993-йисалди ина кIва-лахай ам гуьгъуьнлай Грециядин “LARUS” тIвар алай агентстводиз элячна. IV, III, II дережадин гимидин механиквиляй кьилин механиквилин кIарцIел хкаж хьайи, вичин пешедал рикI алай Магьсим 2006-йисалай инихъ Грециядин «NAVIGATOR SA» компанидин суперинтендент я.
Магьсим Хьилерин чIехи сихилрик акатзавай Арабхан-рикай я. Адан чIехи буба хуьруьн юзбаши хьайи, хийирлу крарихъ ялай, Хьилерин мискIин эцигунихъ пай кутур Мите Къайин-бегов я. КIелунал рикI алай и сихилдай гзаф савадлу ксар    акъатнава. Арабханрин векилрикай са кас Америкадин Бостон Университетдин профессор я: Магьсим Магьсимован хва Эльдар. Экономикадин илимрин доктор тир Эльдара Одессада юкьван мектеб тафаватлувилелди куьтягьна Бостон Универ-ситетда кIелна. Инаг яру дипломдалди акьалтIарай жегьилди пуд йисуз аудиторвиле кIвалах-най. Гуьгъуьнлай ада Нью - Йоркдин ITAKI университетдин докторантурада чирвилер къачуна. Алай вахтунда лезги профессор Эльдар Магьсимов Бостон университетдин нуфузлу алимрикай я.
Магьсим, чна винидихъ лагьайвал, шаирдин рикI авай инсан я. Дуьньядин жуьреба - жуьре уьлквейрай ада акьван иер шикилар чIугунва хьи, абурукай халисан выставкаяр тешкилиз жеда. Адан гьар шикил са вакъиа, уьмуьрдин са легьзе я.
Ингье рикI шадардай мад са кар. Вичин ирид арха чирна сихилдин тар чIугунихъ гелкъвенва Магьсим. Адан улу буба Арабхан XVII асирда яшамиш хьанва. Сихилдин тар гьакIни Хьилерин тарихдин са чIук я.

Седакъет Керимова