ВикIегь чапрас
Мах  |  9(314) 2017      
     Хьана-хьанач кьван са къуьр. Ви­ри къуьрериз хьиз, адазни гьар са куьникай кичIедай. Садра тамай адаз яргъи, кьвечхел тIвал жагъана. Гьа тIвални кьуна фена чапрас тамайгъуз. 
     Са тарцин хъалхъамдай типIрен шарагди кьил акъуднавай. Садлагьана шарагдин кIвач цIуьдгъуьнна, ам мукан цIамарикай галкIана амукьна. Диде тIиб вич шарагдив агакьариз алахъна. Чапрас лагьайтIа, тадиз далудихъ чилел ярх хьана. Гьа и чIавуз типIрен шараг мукай аватна, ингье чилел ваъ, чапрасдин таза руфунал. Шарагдиз са затIни хьанач. Ада мягьтелвилелди чапрасдиз килигзавай. Хвешила къуьрез алхишарайдалай кьулухъ диде тIиб вичин шараг гагь кIуфув, гагьни къармахрив мука тваз алахъна. Ингье гуж агакьзавачир адан. Вучин, гьикIин лугьуз амай тIиб. И чIавуз къуьре шараг кьвечхел тIвалунив муказ вегьена. Им акурла хвешила: «И тама виридалайни викIегь гьайван вун я, чапрас», - лагьана типIре. 
     Къуьр вичин гьунардин сакIани чIалахъ жезвачир. «Вири и тIвалин гьунар я»,  - фикирна къуьре.  
     И чIавуз къуьрез са  сикI акуна. СикIре вичин тапацрив керкил са вуч ятIани элкъуьрзавай. Абурув агатайла адаз ам кьугъуьр тирди акуна. Цацарин кIвалакI нез тежез ажуз хьанвай сикI. Кьуьгъуьрдай лагьайтIа, кичIела витIни акъатзавачир. Адан фурфурдин ванцелай гьайвандин ял атIанвайди чир жезвай. И гьахъсузвилиз эхиз тахьай къуьрез тIвалунив сикIрен кукуз вегьез кIан хьана.  Гъиле тIвал авай къуьр акур сикI къах хьана. Им тахьай хьтин  кIвалах тир. Гьавиляй кьил кьаз кIан хьанач сикIрез къуьрехъ галаз. СикI катиз акур къуьре вичин тIвалунин гуж генани хъсандиз кьатIана. 
     Са герендилай чапрасдиз жанавурди цIуьрнуьгърал вегьез акуна. Хъел акатай ада тIвалунив ничхирдин тIиш акI ягъана хьи, жанавур къув яна катна. 
Гила къуьрез тама садакайни кичIезвачир. ТипIре, кьуьгъуьрди, сикIре чпин кьилел атайбурукай тамуз чав чукIурнавай. Гьайванриз и аламатдин кар чпин вилералди акваз кIанзавай. Къуьр лагьайтIа, къуьнел тIвал алаз чIехи камаралди  хвал галайвал физвай. Хулав агакьайла адаз муькуь патаз элячI тежез амай кьве гъвечIи муьнуьгъ акуна. Агатна абурув къуьр. Къунеллай тIвал хулал вегьена, муьнуьгъар алудна. Им акур гьайванар къуьрен  викIегьвилин чIалахъ хьана. Гьа чIавалай  къуьр тама виридалайни гьуьрметлу гьайвандиз элкъвена.   
     И кар рикIяй туширбурни авай. Тама Какур лугьудай са чапрас авай. Вичин миресдин гьунарар акваз эхиз жезвачир адавай. Пехилвили кьарай атIанвай ам чапрасдин сир чириз кIанз адан гуьгъуьна гьатна. 
     Идакай хабар авачир къуьр галатна вичин мука ахвариз фенвай. Ахварай ам ван алаз рахазвай: «Гена заз и тIвал жагъайди. ТахьайтIа захъ икьван гуж жечир». И гафарин ван хьайи Какура  чап­расдин гъиле авай тIвал къакъудна катна. Ам сикIренни жанавурдин кьилив фена. «Къуьрехъ квез акур гуж амач. Гила квевай адан япар акъажиз жеда», - лагьана  пехил чапрасди. Ничхирар гьатна  къуьрен гуьгъуьна. Какура тамун муькуь гьайванризни эверна. Вичин миресдиз ничхирри гьад кьурла виридаз акуна кIанзавай адаз. Чапрас лагьайтIа, ахварай цIийиз аватнавай. Мукай кьил акъудна килигайла адаз сикIни жанавур кIирер экъисна акъвазнаваз, кьулухъни тамун гьайванар кIватI хьанваз акуна. Къуьрез вичин тIвал кьаз кIан хьана, ингье ам чкадал аламачир. Шерзум хьана къуьр. Ничхиррин сарарикай чан гьикI куьтягьда? Какура тIвал хкажна чапрасдиз аквадайвал  вичин къуьнел туна. Чапрас гьар са куьнин гъавурда акьуна. «Ша экъечIа кван чи вилик!» - хъел кваз лагьана сикIре. «Къалура кван жуван гьунар!», - гьарайна жанавурди. «Вучда гила?» фикирна къуьре. Са кар авай хьи, тамун гьайванри рикI-дуркIун гузвай чап­расдиз, адан чIалахъ тир вири. 
    «Кьиф хьиз чуьнуьх хьунилай лекь хьиз рекьин хъсан я», - лагьана вичи-вичиз къуьре. Садлагьана чил чалухна, накьвар вегьена ничхиррин вилериз. Вилер накьвадив ацIай ничхирар чпел хкведалди хкадарна къуьре кIвенкIве сикIрен нер кIасна ивидалди авуна. Ахпа жанавурдин далудал акьахна вичин хци кикерив ам къазунна. Ничхирар гьарай кьилеллаз катна инай. Чпин хъел тарцин кьулухъ чуьнуьх хьанвай Какуралай алудна абуру: «Я тапрукь, вуна чаз кьур гьад вуч тир?! Гуж амачир къуьр икI жедани? Гила чна ваз вучдатIа аку!» Вичи эгъуьнай фуруз вич аватна Какур.
     «Гуж тIваларани гафара ваъ, рикIе хьана кIанзавайди я», - лагьана викIегь чапрасди вичи-вичиз. Гьа йикъалай тама кичIела адав са ничхирни агат хъувунач.
 
 
 АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Дагълар гъарикI я Чаз ихьтин ктабар кIанзава Niyə əbədiləşdirilmir? В поисках талантов
Статьи из этой рубрики
Хъсанвилиз писвал Жив такур гъед Гатфар Ширин мез Хъсанвилихъ ялун
ЦIИЙИ ТИЛИТ
№: 9(314)
октябрь, 2017

Скачать PDF

РУБРИКИ

ПОЛЕЗНОЕ