Жуванбурун къайгъуда
Чи тавдин кIвал  |  7(312) 2017      
    «Жуванбур» гаф ада акьван рикI алаз, акьван эсерлуз лагьана хьи, жегьилзамаз илимдин кьакьан кукIушриз хкаж хьанвай и кьегьал хайи халкьдал, хайи чIалал, жуван ватандал кьару тирди гьасятда кьатIана чна. Вичихъ чIехи агалкьунар аватIани, кIусни дамах гвачиз рахазвай. Ингье чи жегьил мугьмандиз, 25 йиса аваз медицинадин илимрин кандидатвилин, 33 йиса докторвилин диссертацияяр хвейи профессор Элхан Османоваз адетдин инсан лугьуз жедач.       Гьикьван вичи-вич виниз кьун тавуртIани, адан алакьунри ва агалкьунри гьар са кас гьейранарда. Адакай Россиядин ва къецепатан уьлквейрин журналистри цIудралди макъалаяр кхьенва.
     Вичи секиндаз лугьуда:
     - За вуч авуна кьван, захъ са акьван зурба алакьунар авай хьиз жемир. Им зи уьмуьрда акьалтIай бахтуни гъун я. Са бязи къулайвилер хьаначиртIа, ништа, гьикI жедайтIа…
     Мадни дамах гвачирвал. Вучтин къулай­вилерикай рахазва жегьил профессор? 1999-йисуз Урусатдин алаш-булаш вахтунда кIелун давамарун патал Москвадиз фейи чIаварикай, ана чIугур кьван азиятрикай, гилан чка кьан паталди вич гьатай яцIарикай вучиз лугьузвач ада? Вучиз лагьайтIа адан тIул гьахьтинди я: зегьмет чIугунал рикI хьун, четинвилериз таб гун, макьсаддив агакьун паталди эхирдал кьван женг чIугун, садрани са куьникайни шел-хвал тавун, инсанриз, иллаки жуванбуруз алакьдайвал куьмекар гун. Гьа ихьтин къилихрин иеси яз уьмуьрди лигимарнава Элхан.
     1975-йисуз Бакуда дидедиз хьайи Элхан Османова ина 247-нумрадин юкьван мектеб тафаватлувилелди акьалтIарна. Азербайжандин Гьукуматдин Медицинадин Университетда кIелдай вахтундани ада маса жегьилриз чешне къалурна, ам Н.Нариманован тIварунихъ галай стипендиядиз лайихлу хьана. 1998-йисуз университет яру дипломдалди куьтягьай жегьил гьа чIавалай хирургиядай Бакудин тади куьмекдин азарханадин базадин интернатурада хьана.
     ДатIана илимдихъ ялзавай Элхана 1999-йисуз Москвада вичин чирвилер артухарун къарардиз къачуна. Ина И.М.Сеченован тIварунихъ галай сад лагьай   Москвадин  Гьукуматдин Медицинадин Университетдин ординатурадик экечIай ада кьве йисан къене хирургвилин пеше лап хъсандиз чирна. Гьа ина профессор А.М.Шулуткодин регьбервилик кваз адан пешекарвилин алакьунар гуьнгуьна гьатна. 17-йисан къене адетдин клиникадин духтур кафедрадин профессорвилин дережадив агакьна. 2002-йисуз Элхана медицинадин илимрин кандидатвилин, 2009-йисуз докторвилин диссертацияяр хвена. Гила гьам университетда тарс гузва, гьамни и университетдин клиникада кIвалахзава.
     150 илимдин кIвалахдин, хирургиядай сифте яз арадал гъайи 3 цIийивилин автор тир Элхан Османова дамаррин хирургиядин илимдик чIехи пай кутунва. Адан «Ириндин хирургиядин плазмадин технологияяр» тIвар ганвай монография гьам Россияда, гьамни къецепатан уьлквейра вакъиадиз элкъвена. Адан тек са Швейцарияда илимдин конференциядал авур рахунрикай ва теклифрикай 30-далай гзаф уьлквейрин пешекарри менфят къачузва. Трамбофлебит, варикоз, трамбоз, атеросклероз хьтин залан азарар сагъарзавай алимди икьван гагьди 10 агъзурдав агакьна операцияяр авунва. Адан регьбервилик кваз са касди кандидатвилин диссертация хвенва. И рекьяй мад са кас гьазурзава.
     Элхан Османован дуьньякьатIунрини инсан гьейранарда. Даим гьерекатда хьун, са гьихьтин ятIани цIийивал арадал гъун, датIана чирвилер артухарун адан кьетIенвал я. «Гележег патал вахъ гьихьтин планар ава» - лагьайла алимди икI жаваб гана:
     - Москвада агъзурралди лезгияр яшамиш жезва. Гьавиляй заз ина лезги духтуррин кIватIал арадал гъана жуван ватанэгьлийриз кьилди къуллугъ ийиз кIанзава. Чахъ медицинадин чара-чара хилерай алакьунар авай духтурар гзаф ава. Анжах кцIарвийрикай чеб вири Москвадиз сейли тир са шумуд касдин тIварар кьаз кIанзава. Ина вич тIигьирви тир медицинадин илимрин кандидат Руьвшен Исламов тIвар-ван авай хирург я. Алимрикай Элхан  Сулейманов хъсан хирург, Элхан Шингъаров хъсан педиатр яз гьисабзава. Педиатриядин Институтдин илимдин къуллугъчи тир Гьажимурад Гьажиева «Медфорд» тIвар ганвай кьилди клиника ачухарнава. Гьанин кьилин духтурни вич я. Терапевт Алик Кичибеговни чахъ дамах кутазвай духтуррикай я. Гьеле Дагъустандай тир чи лезги стхайрин арада гьикьван машгьур пешекарар ава. Чна ихьтин къуватрикай менфят къачуна кIанзава.
     Элханахъ мад са мурад ава. Ада лугьузва: 
     - Зун лезги макьамрал гзаф рикI алай инсан я. Гьавиляй жувани чIагъан ягъиз чирзава. Заз Москвада кьилди лезги ансамбль арадал гъиз кIанзава. И ниятдалди чна са кьадар музыкадин алатарни гъилик авунва.
И крар жегьил алимди лезгивал хуьн патал ийизвайди я. «Эвел жуван хизанда, ахпа халкьдин арада лезгивал хвена кIанзава», - лугьузва ада.
     Элхана гьакI хизандин кьил хьизни чешне къалурзава. Адан уьмуьрдин юлдаш тир Сабинади Азербайжандин Гьукуматдин Медицинадин Университет куьтягьайдалай кьулухъ ординатура Москвада сад лагьай Медицинадин Университетдин гинекологиядин ва акушервилин факуль­тетда акьалтIарна. Алай вахтунда ада дис­сертациядин  винел кIвалахзава. Ништа, абурун аялри - Омара, Муслима ва Аидадини гележегда илимдихъ ялда жал.
     Вичин бубаяр КцIар райондин Аваран хуьряй тир Элхан Гьажиханан хва гьакIни тIебиатдал, поэзиядал, газет-журнал кIелунал гзаф рикI алай инсан я. «Самур» газетдин кIвалахдарриз ва кIелдайбуруз агалкьунар тIалабайдалай кьулухъ ада лагьана:
     - Чна виридалай вилик чи хайи чIал, меденият, адетар хвена кIанзава. Хайибурун къайгъу чIугун, чирвилер къачун, жуван карда гьамиша чешне къалурун, вирина лезгивал хуьн чи буржи я. Им зи гьар са лезги жегьилдиз эвер гун я.
     Мад вуч лугьун. Им виридан рикIяй хабар гузвай эвер гун я. Жуванбурун къайгъуда жен лугьузвай жегьил алимди хъфидайла жузуна: «Бес квехъ са тIалабун авачни?» «Ава, - лагьана чна, чи мурад вун илимдин мадни кьакьан кукIушриз хкаж хьун, виликай къвезмай йисара академик хьиз ватандиз хтун я…»
 
Муьзеффер МЕЛИКМАМЕДОВ
 

Муьзеффер МЕЛИКМАМЕДОВ

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я ЧIал гъиляй физва Къелемдив женг чIугвазвай зари Винел акъудзавачир делилар Könül körpülərİ
Статьи из этой рубрики
Жегьилар ва интернет Мурад кьилиз акъатна Редакциядин мугьманар Редакцияди мугьманар кьабулна С любовью к родному языку
ЦIИЙИ ТИЛИТ
№: 9(314)
октябрь, 2017

Скачать PDF

РУБРИКИ

ПОЛЕЗНОЕ