Дуствилин аламат
Мах  |  4(309) 2017      
     Къуьрерин хизан тама къекъвез­вай. Хизандин чIехибуру недай затIар жагъурзавай, гъвечIибур чуьнух-муьнуьх къугъвазвай. Диде къуь­ре вичин шарагриз «яргъал фимир, кьуд пад ничхирар я» лугьузвай. ГьакI ятIани шапIайри чпиз чидайвал ийизвай. Абурукай сад кьуьзуь мегъуьн тарцин кьулухъ чуьнуьх хьана. Садлагьана адан япарихъ цIугъдай ван галукьна. Ван галайнихъ фейи шапIадиз чIехи пипин тарцин кIаник къатадзавай сикIрен шараг акуна. Ам вичин кIвач ракьарай акъудиз алахънавай. ТIал гзаф хьунивай генани кIевиз цIугъзавай. 
     ШапIадиз сикIрен шарагдин язух атана. Ам куьмек кIанз вичин хизандин патав катна. Ингье дидедиз вичин шарагар тамун ничхиррикай садан сарак акат тавунмаз муказ хутхуз кIанзавай. «Тама гьарада вичи-вичиз куьмекна кIанзавайди я», - лугьуз гъвечIидан гафар кваз кьаз­вачир. ШапIади лагьайтIа, адалай гъил къачузвачир.  
     Ам алат тийиз акурла диде къуьре куьмек гун патал тади къачуна. Чкадив агакьайла диде къуьрен пагь атIана. Адаз кIвач ракьара авай сикI акуна. КичIе хьайи къуьре вичин шарагдин япарикай кьуна цIвехна. Мука ада шапIадиз лагьана:
     - Чун кьведни сикIрен сарак акатиз тIимил амай. Садрани а гьайван галайнихъ фимир. Абуру чун хьтин къуьрер уфни талана незвайди я.
     - А шараг гьа зун  кьван ава эхир. Адавай зун нез женни?
     - Эхь, са тIимил чIехи хьун кумазни ам къуьрерал гьавалат жервал я. Гьа ракьара амукьайтIа хъсан я.
     Дидедин гафари шапIадик къалабулух кутунатIани, сикIрен шараг адан рикIелай алатзавачир. Са герендилай ам садазни талана тамуз катна. СикIрен шарагдив агатна, са гафни талана адаз куьмек гуз эгечIна. Вичин гъве­чIи тапацар ивидалди авур шапIадивай эхирни сикIрен кIвачI ракьарай акъудиз хьана.     Хвеши хьайи сикIрен шарагди шапIадин чиниз мез гана. Тихтихар акатай шапIа ван алаз хъуьрена. 
     Гьа йикъалай къуьрен шапIани сикIрен шараг кIеви дустар хьана. Экуьнин яралай рагъданалди абур санал къугъ­ваз, шандакьвализ, лугьуз-хъуьрез жедай. Гьа икI, гзаф варцар алатна. 
     ГьикI ятIани шапIадин хизанди и дуст­виликай хабар кьуна. Диде къуьре шапIадиз ахмурарна:
     - Къуьрни сикI дуст хьун гьина акур кар я? Кьве юкъуз къугъвана, пуд лагьай юкъуз ви кьил алцурарна хамни галаз неда ада. Адавай яргъал акъваз. 
     ШапIа вичин дустунин пад хуьз гьикван алахънатIани, дидедин хъел элекьнач. СикIерин тIул адаз хъсандиз чизвай. 
     - Мад вун адахъ галаз къугъвайтIа, за ви яргъи япар акъажна сад-садал алчударда, - лагьана телегь-билегь авуна ада шапIадиз. 
     Вичин дуст акваз кIанз рикI акъатзавай шапIа мука гьахьна зарулдаказ шехьна.
     СикIрен хизандизни къуьрен шапIадикай хабар хьана. Буба сикIре вичин шарагдиз хъел галаз лагьана:
     - Са шапIа кьванни кьуна нез тежедай вун гьихьтин сикI я? Къуьрехъ галаз дуствал ийизвай вакай ничхир женни? Вуна ам недатIа неъ, тахьайтIа мукай къецел экъечIмир. 
     Чара атIай сикIрен шараг гила эверайтIани къецел акъатзавачир. Са кьадар вахтар гьа икI алатна. Варз алай са йиф тир. СикIрен вилиз сакIани ахвар физвачир. Садлагьана адаз тамун къуьрер авай пата таран хилерал яру цIверекIар акуна. Там кузвайдан гъавурда акьур сикIрен шарагди вичин хизан ахварай авудна, цIвехна.
     Тум цIу кайи ада каш кьунваз къуьрерин мукав агакьна гьарайна:
     - ШапIа! Вун гьинава? Таму цIай кьунва! 
     Адан ванцел ахварай аватай къуьрерин хизандиз и гъилера сикIрекай кичIе хьанач, вучиз лагьайтIа кумада ифин гьатнавай. Абур тадиз къецел экъечIна, вир галайнихъ катна. 
     Вичин шапIа такур диде къуьрез кичIе хьана. Садлагьана мука цIай кьуна. ШапIа къене амайди хьиз хьайи адай гьарай акъатна. Къуьре вич чилел гьалчиз къахчузвай. И чIавуз диде сикIре агатна лагьана:
     - Шехьмир, я къуьр. Ви шапIадиз затIни хьанвач. Тум са тIимил алугнава, гьамни дуьз жери кIвалах я. Дустуниз хабар гун патал цIун къеняй катна вич чав агакьарнавай ада.
     - Ви шарагдини чи хизан кьиникьикай куьтягьна. Ада хабар ганачиртIа, чун вири кудай, - хълагьна къуьре.
Гьа икI, дуствили кьве хизан хвена. 
 
АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
Туьркиядин лезги хуьр Дуьмберез Türkiyə ləzgiləri Кьурагь дередин тават Я Лацарин Гавдан дере Маршалдин чар
Статьи из этой рубрики
Жив такур гъед Хъсанвилиз писвал Гатфар Жанавур жез кIан хьайи хеб Цекверин тарс
ЦIИЙИ ТИЛИТ
№: 3(319)
апрель, 2018

Скачать PDF

РУБРИКИ

ПОЛЕЗНОЕ