Ватандин ЧIехи дяведилай 72 йис алат­наватIани, а ягъ-ягъунра халкьдин кьилел атай мусибатрикай, кьегьал­вилелди душмандин хура акъвазай чи аскеррикай цIийи-цIийи делилар винел акъатун давам жезва ва инлай кьулухъни давам хъжеда.

     1941-1945-йисара КцIар райондин Му­чугъ хуьряй 250 кас дяведиз фенай. Абурукай 128 кас женгера гьелек хьана. Хуьруьз хтай 122 касдикай гзафбурал залан хирер алай. Исятда дяведин ветеранарикай тек са кас - Азрекъули Рзаев сагъ ама. 

     Гьа инал лугьун хьи, дяведа му­чугъ­вийрини вири лезгийри хьиз къагь­риманвилер къалурнай. Алибала Ниф­тиева женгера кьве Баркаллувилин Ор­ден, кьве Яру Гъед Орден ва цIуд­ралди медалар къачунай. Генерал Мали­новскийдин адъютант хьайи кьилин лейтенант Мегьамед Азизоваз I дережадин Баркаллувилин Орден, Яру Гъед Орден, гзаф медалар ганай. Мад са кьегьалди - гвардиядин лейтенант Севледдин Рагьимханова кьведра Яру Гъед Орден ва Баркаллувилин Орден къачунай.

     Заз са кьегьал мучугъвидикай кьилди лугьуз кIанзава. Вучиз лагьайтIа инсанриз адакай са акьван чирвилер авач. Дяведилай вилик институт акьалтIарна ТIигьир хуьруьн юкьван мектебда муаллимвиле ва директорвиле кIвалахай Аюб Къадимов ха­лисан къагьриман тир. «Коммунист» га­зет­дин 1958-йисан 23-февралдиз акъатай нумрада «Азербайжандин  викIегь рух­ваяр» тIвар алаз чапнавай макъалада адан тарифар авунва. Адан тIвар гьакIни «Азер­байжандин баркаллу рухваяр» ктабда гьатнава.

     Сталинград хуьдайла душмандин 25 танк ва 200-дав агакьна аскерар терг авур Аюб Къадимован тIвар Сталинграддин обе­лискдал ала. Волгограддин музейда адаз талукь экспонатар хуьзва. Ам гьихь­тин къагьриман тиртIа чир хьун патал 62-Армиядин командир, мар­шал В.И.Чуйкова Къадимоврин хи­зан­диз ракъурай чар кIелун бес я. Мар­шалди икI кхьенва: «Куь хва Аюб Къадимова Сталинграддин ягъунра чIехи къагьриманвилер къалурна. Чи армиядин аскерри адалди дамахзава. Ихьтин рухваяр чIехи авур халкьдиз баркалла!»

     Халкьдихъ дамах кутадай Аюб Къадимов хьтин кьегьал рухвайрин тIвар гьамишалугъ чи рикIера амукьда.

 

Агъаверди АЛИВЕРДИЕВ,

КцIар райондин Мучугъ хуьр