Я Лацарин Гавдан дере
Фольклор  |  4(309) 2017      
     Зи диде Майтабан лезги баядрал гзаф рикI алай. Ада аваздалди абур лугьудайла, вири гьейран жедай. Са ялце вишелай гзаф баяд куьз жедай дидедин чIаларин булахдай. Абурукай са кьадарбур за кхьена редакциядиз ракъурзава.
 
Мегьерали НАГЪИЕВ,
КцIар райондин Лацарин хуьр
Къацу багъдин юкьва гьавиз,
Курум-курум яд алахьиз.
Стхадин чар кIелзава за,
Кьве вилелай нагъв авахьиз.
 
Къацу багъдин юкьни-юкьвал,
Зар хараяр цузавай руш.
Ви дердинай сефил я зун,
ЦIай галачиз кузавай руш.
 
Зун и пата, вун и пата,
Чан и патаз текъведай яр.
Лацу бишме гардандаваз,
Дагъдин къвед хьиз къекъведай яр.
 
Цуьквед багъда таза гелер,
Акваз яр, вун шезавани?
Заз лишандин тупIал тагъай,
Ваз рахадай мез авани?
 
Вили цава варз аквада,
Я ацIай варз, я ацIай варз.
АцIай вацран экуьник ша,
Белки кьсмет жеда жал ваз.
 
Мани лугьур ви сивиз кьий,
Гьар гафунихъ мас авай яр.
Къариблухра вучзава на,
КIвале кIани свас авай яр.
 
Вили цавар дамар-дамар,
Чубарукдин сиве самар.
Стхаяр фей вахар я чун,
Рехъ ахъая, кьакьан дагълар.
Дагъларин кIукI вуч кьакьан я,
Ценеривай вацI физавай.
КIани къелем яргъараваз,
Зи рикIин кьил кьацI жезава.
 
И пад дере, а пад дере,
Силибурдин синел бере.
Агъзур жуьре цуьк акъуддай,
Чан Лацарин Гавдан дере.
 
Дагъларилай килигайла,
ХупI иер я Лацар яйлах.
Цуьк хураваз авахьзава,
Шумудни са ацIай булах.
 
На дагълара векь ягъада,
За ви маргъар таз экъведа.
Ирид йисуз лишан квай яр,
За ви дердер гваз экъведа.
 
Синидаллай лацу бишме,
Ам заз гъайи бахшандар я.
На чарадаз килигмир, яр.
Вакай элди рахшандарда.
 
Къаварилай къаваралди,
Ярдин рекьер галудна за.
Зарул-зарул бендер лугьуз,
Яр ватандив агудна за.
 
Тик гуьнедал тек инид тар,
Гатфар хьана, вун къацу хьуй.
Зун лагьана, масад гъайи,
Вун чи Самур вацIу тухуй.
 
ЭрчIи гъиле чуьнгуьр кьуна,
На ашукьвал чирзава, яр.
Фикир-хиял патараваз.
На зун вучиз ширзава, яр?
 
     Алай йи­­суз вичин 70 яшар жезвай Мегьерали Нагъиев КцIар районда Мегьерали Лацуви хьиз сейли я. Хуьруьн вилик-кьилик галай, шаирдин рикI авай и касди теснифнавай шиирар, адан гафариз кхьенвай манияр лацувийриз хъсандиз чида. 
     Гзаф йисара КцIар райондин тарихдинни медениятдин гуьм­бетар хуьдай идарада, гуьгъуьнай хуьруьн беледияда кIвалахай и кас гила пенсиядиз экъечIнава. Агъадихъ чна адан са шиир гузва.
 
Лацар
 
Ният михьи, мугьман кIани,
Икьван масан са хуьр женни?
Кхьиз шиир, лугьуз мани,
Ви тарифда за икI, Лацар.
 
Кьуд пад чарчар, дамар-дамар,
Чи яйлахар – чичIид гамар.
Кьилихъ галаз чи Шагь дагълар,
Гавдан деред цуьк я Лацар.
 
Ви яйлахра кутуна ван,
Кфил ягъиз шад я чубан.
Эллер къени, чилер кIубан,
Чи дагъларин рикI я Лацар.
 
Майтаб ЛАЦУВИ
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
Туьркиядин лезги хуьр Дуьмберез Türkiyə ləzgiləri Кьурагь дередин тават Маршалдин чар XVII виш йисан лезги зарияр
Статьи из этой рубрики
Яран мисалар ЧIалан меле Къурушвийрин мисалар Бадейрин кьула Бадедин йикъарган
ЦIИЙИ ТИЛИТ

РУБРИКИ

ПОЛЕЗНОЕ