Поэзия | 3(308) 2017
Гьасанова Гюзеля Мегьарамдхуьруьн районда дидедиз хьана. Тагьирхуьруьн Къазмайрин мектеб куьтягьна, Дагъустандин Гьукуматдин Педагогикадин Институтдин филологиядин факультет акьалтIарна. Вичин хизанни галаз Ленинград вилаятдин Гатчина шегьерда яшамиш жезва. Санкт-Петербургдин университетдин филологиядин факультет акьалтIарай ада урус чlаланни литературадин муаллимвиле кIвалахзава. 2008-йисуз РФ-дин президентдин “Урусатдин виридалайни хъсан муаллим” грантдиз лайихлу хьана. 2016-йисуз “Булах” тIвар гана арадал гъайи кIватIалдин регьбер я.
Шииратдин са кIватIал
Гъурбатдавай атир галай цуькверлай,
Багьа я заз зи ватандин къалгъанар.
Ухшар я чун алатайдаз рекьелай -
Хайи чилихъ цIигел хьанвай инсанар.
Ватандин тIал ава лугьуз зи чанда,
Ялда вичихъ Лезгистандин эверди.
Гьар иер гаф заз шиирда тваз кIанда,
Нур гуй лугьуз зи илгьамдин бегьерди.
РикI цIразва, зи вил хьана дидедихъ,
Хайи хуьруьхъ – рикIиз чими дигедихъ .
Шуршурдин ван япарава булахдин,
Заз махпурдал къекъвез кIан я яйлахдин.
Каспи гьуьлуьз салам гуда Невадлай:
(Адаз за гаф ганавай тир лап фадлай.)
Эвер гуда за, дустар, квез Мамрачдал,
Ша, туькIуьрин шииратдин са кIватIал.
Чи гьиссер
Шумуд югъ я чун чахъ галаз рахазвач,
Шумуд югъ я вахъ вил гала – аквазвач.
Къакъатда жал? Чи араяр рекъизва…
Белки ибур чи гьиссер я рекьизвай?
Вуч иер тир чун саналлай легьзеяр,
Хкажзавай муьгьуьбатдин мезреяр.
Са чIавара чун шиирдал рахадай -
Ви гьар са цIар заз гевгьердай аквадай.
Мукьвал-мукьвал гъидай вуна заз цуьквер,
Заз акI жедай зи умудрин я эквер.
Вун гьазур тир багъишиз заз са алем,
Амани ви гьиссеррикай са цIелхем?
Зи кьатIунар ваз аквадай вилерай,
А вилерал вун ашукь тир кIевелай....
ВутI хьана ашкъ, савкьват тир чаз Аллагьдин?
Кьурана жал хел илгьамдин булахдин?
Шумуд югъ я чун чахъ галаз рахазвач,
Шумуд югъ я вахъ вил гала – аквазвач.
Къакъатда жал? Чи араяр рекъизва…
Белки ибур чи гьиссер я рекьизвай?
Вахъ галаз зун бахтлу я
Ацукьнавай абур къуьн-къуьне туна:
- Вуж я ваз зун? – дишегьлиди жузуна.
Фикирна хьиз, экв атана вилериз,
Вил вегьена касди фейи рекьериз.
КIанивилин гьиссер рикIе къугъвана,
Ахпа ада вичин папаз лагьана:
- Патав гвайла вун - алатда рикIин къал,
Секин жеда чанда гьатай гьар са тIал.
Яргъал вахтар са легьзедиз элкъведа,
На лугьуди, женнет багъда къекъведа.
Лувар кутаз вуна цавуз акъудда,
Кьилел атай балайрикай хкудда…
Залан жедач кьуртIа капал заз дагълар…
Куьрелди: куьз герек я лагь и гафар?
Зи къилихрин чIурудини къениди
Кьабулзавай баркалла ваз, кIаниди.
Ша, ацукьин чун гьамиша къуьн-къуьне,
Уьмуьр тухун кIевиз кьуна гъил-гъиле.
Кьвед сад хьана физвай уьмуьр гьахълу я,
КIан я заз вун - вахъ галаз зун бахтлу я…
Скачать PDF
Комментарии к статье
Будьте первым кто оставит комментарий к статье.Оставить комментарий