Поэзия | 3(308) 2017
Омар Къазиханов Дагъустан Республикадин СтIал Сулейман райондин Птидхуьре дидедиз хьана. Ина юкьван мектеб куьтягьна, Волгоград шегьердин медицинадин колледждик экечIна. Алай вахтунда 3 лагьай курсуна кIелзава. О.Къазиханова аял чIавалай гатIунна лезги чIалал шиирар кхьизва.
Рушар
Галукьдалди ракъин нурар,
Куьн булахдал жеда вири.
КIулал кьуна залан кварар,
Экуьнин къушар я, рушар
Чуьлда туна авазрин ван,
Билбилар квел жеда гьейран,
ТIебиатдал гъизавай чан,
Куь шумуд яшар я, рушар?
Кьил хкажна килиг тийиз,
Зун акурла алатна физ,
Халкьнава куьн хупI иердиз,
Жейранриз ухшар я, рушар.
Дидедиз
Заз дидедин рехи хьанвай мегеркай,
Шалбуз дагъдин кукIушрин къведа ухшар.
Яваш-яваш диде кьуьзуь жезва зи,
Акваз-такваз гзаф жезва хупI яшар.
Зи дидедиз гьикьван гужар акуна,
Четинвилер къерех хьанач адавай.
Къени физвач гьич са затIни рикIелай,
ЧIугур кьван пар гьисаб жедач садавай.
Гьикьван кIеве гьатайтIани, чирдач чаз,
Чахъ руьгь кутаз, милидаказ хъуьреда.
Анжах гагь-гагь, хиялри кьур береда,
Вилерилай накъвар физ ам ишеда.
Залай бахтлу кас жедачир дуьньяда,
АлакьнайтIа жегьил чIавар элкъуьриз.
Азиз диде, вун кьуьзуь тахьуй лугьуз,
Зун гьазур я жуван чан кьурбанд ийиз.
Скачать PDF
Комментарии к статье
Будьте первым кто оставит комментарий к статье.Оставить комментарий