Къекъвераг
Мах  |  3(308) 2017      
     Дагъдин хуьре вирибурун кьарай атIанвай. Иниз са къураба атанвай. Вич кIвал-югъ, мукьва-кьилияр авачир кас я лагьана, хуьрунвийривай куьмек кIан хьана адаз. Инсанриз адан язух атана, кlвал гана, алакьдай куьмекар ийиз алахъна. Сада тIуьн, сада пек-лек гана, сада кIвалихъ галайвална. 
     Ингье са кьадар вахтар алатайла хуьруьнбуруз ам къекъвераг тирди, гьавиляй вичин хайи хуьряй чукурнавайди чир хьана. Вичиз азият тагана кьил хуьзвай и кас ара датIана садакьаяр кIватIун патал идан-адан ракIарихъ жедай. Икьван гагьди къекъверагвал вуч ятIа тийижир хуьруьнбурувай и кар сакIани эхиз  жезвачир. Кагьулвили тIушуннавай къурабади багьнаяр гъиз кlвалахрикай кьил къакъуддай. И кар залай алакьдач, а кар завай жедач лугьуз гьеллеярдай. 
     Са тIимил чlавалай инсанри гаф-чIал сад авуна, адаз чин ганач. Гила нин ракIар гатайтIани, ам садани кIвализ тазмачир, адаз затIни гузмачир, садбуру чукурзавай кас. ЯтIани ада чинал хъурхъ акьалжнавайди хьиз гъил ахъайна садакьа тIалабдай. 
    Чан туьтуьниз атай дагъвияр садра вучин-гьикlин лугьуз меслят гъун патал санал кIватI хьана. Хъел авай абуруз. И хуьре къекъвераг хьун вирибуруз дакIан кар тир. Садбуру ам атай чкадиз чукур хъийин, муькуьбуру кьилиз акьул къведалди гатан лугьузвай. Анжах хуьруьн рехибурун меслятдалди инсанри адаз масакIа тарс гун къетIна.
     Къекъвераг мад гъилера кIвал-кlвал къекъведайла вирибуру адаз кlвалахдай алатар гузвай: пер, цуьруьгъуьл, кьуьк, кIута, мишер, йиге... «Я шкьакьар, за ибурув руфун гьикI тухарин?» -  лугьуз пашмандаказ жузазвай къурабади. «Вирида хьиз кIвалахна жуван кьилиз чара ая», - лугьузвай адаз жемятди.
     Чара атIай кас кIвалахиз мажбур хьана. Адан гъиляй кIвенкIве са карни къведачир, ингье югъ-къандивай гъил ацалтна. Са тlимил чIавалай ам кlвалахдик гьикI ктканатIа, вилериз фу-ядни ахквазмачир. Адан рикIелай кагьулвал алатна, гьар са кардихъ рикI алаз гелкъвена. Касдин кIвалахдик цIигел хьанвай гъилери ийидай кар чпи жагъурзавай. Вичин кIвал-югъ гуьнгуьна хтуна, гъен, сал цIарцIе тур касди хуьруьнбурузни куьмекар гузвай гила.
 
АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Яран сувар, жуван сувар Редакцияди мугьманар кьабулна Для сохранения языка Мубарак
Статьи из этой рубрики
Хъсанвилиз писвал Гатфар Жив такур гъед Пехъ Ширин мез
ЦIИЙИ ТИЛИТ
№: 4(309)
апрель, 2017

Скачать PDF

РУБРИКИ

ПОЛЕЗНОЕ