Газета Самур

Мубарак
Барка | 3(308) 2017

Гьар са нумра сел тир вацIун яд авай,

Лезги газет Бакуда тек сад авай.

«Правдадихъ» хьтин еке ад авай,

«Самур» газет, ваз и сувар мубарак!

Четинвилер алуд ийиз винелай,

Лезги чIалан тереф хвена кIевелай.

Багьа тир затI течир хайи чилелай,

«Самур» газет, ваз и сувар мубарак!

Лезги халкьдин и пад, а пад талгьана,

Ваз Бакуда газетхана – кIвал хьана.

Халкь кьве патал хьун рикIевай тIал хьана,

«Самур» газет, ваз и сувар мубарак!

Газетдал рикI алай ксар сад хьана,

Гьар са нумра кIватIалзавай гад хьана.

Къанни вад сан яшар хьана, шад хьана,

«Самур» газет, ваз и сувар мубарак!

Зазни чка жагъанай куьн газетда,

Гьар са цIийи нумра хтун гуьзетда.

Сажидина лугьузва чи адетда:

«Самур» газет, ваз и сувар мубарак!

Сажидин САИДГЬАСАНОВ

Комментарии к статье

Сажидин Саидгасанов 27.03.2017 06:02

Пара кьван шад хьана заз, гьуьрметлу вах Сидагет ва амай "Самур" газетдин играми къуллугъчияр. Лезги кьалкьдин векилар тир куьне Азербайджанда ч1угвазай зегьмет гьич садалайни алакь тийидайди я. Са газет акъудунал сергьят эциг тавунва, куьне арадал гъанвай "Сувар" ансамблди виринра чи лезги халкьдин адетар, къуьлер, манияр къалуриз, чи халкдихъ къадим тарих авайди, чахъ жуван ч1ал, жуван шаирар авайди, дуьньядин ч1ехи миллетрикай сад тирди тестикьарзава. Лезги халкьдин тарихъда куьн т1варар къизилдин гьафаралди кхьидайдахъ зун к1евелай ягъазва. Квехъ мадни гзаф агалкьунар хьана к1анзавай шаир Сажидин.