Чи тавдин кIвал | 3(308) 2017
Алай йисан 9-мартдин югъ “Самур» газетдин коллектив патал рикIелай тефирди хьана. А юкъуз редакция халисан мугьманрин тавханадиз элкъвена, чна лезги эдебиятдин векилрин эсеррал рикI алайбур кьабулна. КIелдайбуруз регьят хьун патал абуруз сятдин 14-далай 18-далди, чпиз кутугай береда къведай мумкинвал ганвай.
Ингье садбур пакаман кьиляй, сятдин 10-далай къвез гатIунна. Абурун арада алимар, муаллимар, шаирар, чара-чара пешейрин сагьибар авай. «Самурдин» кIвалахдаррихъ галаз мукьувай таниш хьун патал Азербайжандин чара-чара районрай атайбурни хьана. Санлай а юкъуз 40-дав агакьна кIелдайбур чи редакциядин мугьман хьана.
Абурухъ са хизанни галай. 25 йисуз ара датIана «Самур» газет кхьизвай, вич КцIар райондин Ясабрин хуьряй тир, гзаф йисара Бакуда уьмуьр гьалзавай Айда Айдаеван хва Фуад вичин уьмуьрдин юлдаш Тамилладихъ ва адан руш Айнелахъ галаз санал атанвай.
Жегьил хизандин яратмишунрал рикI алайди гьасятда кьатIана чна. Гъуьлни паб бизнесдилай гъейри чIугварвиливни машгъул жезва. Абурун Бакудин 145-нумрадин мектебдин 8-синифда кIелзавай руш Айнелан лагьайтIа, урус чIалал шиирар кхьинал рикI ала. А юкъуз адан шииррихъ мукьуфдивди яб акална чна.
Айнелахъ шаирвилин алакьунар, кIетIен хатI, вичин дуьньякьатIунар, махсус тематика авайди вирида къейдна. Виликай къвезмай тилитрикай сада адаз кьилди чка чара ийида лагьана гаф гана чна. Редакциядин коллективдин къайгъударвал акур Айдаеври чпин разивал къалурна.
А юкъуз редакцияди «Ачух ракIарар» мярекатдиз атайбур садни гъил ичIиз рекье тунач. Гаф гайивал, абуруз лезги кхьирагрин ктабар пишкеш яз гана.
Айнур БАЙБУЛАТОВА
Скачать PDF
Комментарии к статье
Будьте первым кто оставит комментарий к статье.Оставить комментарий