Жуван кIвал
Мах Мах  |  2(307) 2017      
     Тамуз мукьва кIвалин гъенел, чIехи тарцин кIаник туьтуьна зунжур авай са кицI ярх хьанвай. Садлагьана кицIи япар хкажна. Гуьнедал вацраз килигиз къув ягъиз­вай жанавур акуна адаз. КицIи ампна. И ван хьайи жанавурдиз кIвенкIве катиз кIан хьана, ингье кицIин туьтуьна авай зунжур акурла адав агатна:
     - Вуч хьанва, я мирес? Вуна вучиз ампзава?
     - Бес вуна вучиз къув ягъизва?
     - Зун жанавур я. Варз акъа­тайла адаз ки­лигна къув ягъун чи адет я.
     - Пехил я зун вал, мирес. Садазни муьтIуьгъ тахьана жуваз кIандайвал азаддиз къекъвезва вун.
     - Авайвал лагьайтIа, зунни вал пехил я. Ви къайгъу чIугвазвайди, ви кьилелай кап аладарзавайди ава. Ви вилик гьазур тIуьн гъизва. Тамара, чуьллера къекъвез, гъурчехъанрикай катиз тIуьн жагъурун вучтин кар ятIа чизвач ваз. 
     - Туьтуьна зунжур аваз уьмуьр гьалун бахт яни? 
     - АкI лугьумир. Вун инсанди вичиз дуст кьунва. Гагь валай кап аладарда, гагь ви вилик кIараб вегьида...
     - Гагьни тIвал илигда. КIвалин виликай сад фейила зани вири кицIери хьиз ампда. И чIавуз заз къван гуда. Гагь-гагь сад кIвалив эгечIайла зун иеси­дикай кичIела кисна акъвазда. Адаз хъел къведа, вуна ван вучиз акъудзвач лугьуда. ГьикI авуртIани четин я.
     - Пагь, заз ви чкадал жез кIандай.   
     - Ша чна чкаяр дегишарин. Пара ваъ, са шумуд юкъуз. 
     - КичIе я заз. Жанавурар аквадай вил авач инсанриз. Чир хьайитIа, ягъа­на рекьида абуру зун.
     - КичIе жемир, садани байих ийич. Зи иеси кIвализ йифиз хквезвайди я, мичIила адаз вун чир жеч.
     Са икьрардал атана гьайванар. Сада къув ягъиз, муькуьда амп ийиз чирна. Ахпа жанавурди хци сарарив кицIин туьтуьна авай зунжур ялна алудна, вичин кьил гьана туна. КицIни тадиз тамуз катна. Фадлай азадвилихъ цIигел тир ам.
     Ингье хвешивал яргъалди фенач адан. МичIи таму кицI къарсурна. Садлагьана са вуч ятIани кицIин виликай лув гана алатна. Им тIиб тир. Таран хилел ацукьнавай типIрен экъис хьана экв гузвай вилер акурла зурзун акатна адахъ. Йиф акъатдалди адан вилиз ахвар фенач. Йикъа пудра нез вердиш хьанвай кицI тама хьайи са шумуд йикъан къене яхун хьана гьалдай фена. КIвалин гьайвандиз тама тIуьн жагъурун регьят тушир кьван. Са нуькI кьванни кьаз алакьзавачир адалай. Сарак кутаз кIан хьайи кьуьгъуьрни нез жедай затI тушир. Адан цацари кицIин диргариз тIал акъудна.
     Са шумуд югъ икI алатна. Такьат амачир кицIи ярх хьана далудиз рагъ гузвай. Адан хиялдай вичин чими кума, ял авай бади физвай. Садлагьана адаз тфенгдин ван атана.  Абур хуьруьн малар тергзавай жанавур жагъурзавай гъуьрчехъанар тир. 
КичIе хьайи кицI кIвал галайнихъ катна. КIвалив агакьайла адаз иесиди чIехи са лаш кьуна жанавурдал илигиз акуна. Тапацрив вичин кьил кьуна зарулдаказ цIурзавай ничхирди. Иеси кIвализ гьахьайла кицI жанавурдив агатна:
     - Я мирес, зун тама гишилани мекьила рекьиз тIимил амай. Заз я азадвал, яни чуьллер кIанзамач. 
     Ам акур жанавур хвешила шехьна: 
     - Зунжур, тIвал, муьтIуьгъвал... Ваъ, стха, икI са уьмуьр гьалунилай азадвиле са югъ акъудна рекьин хъсан я.
     - Эхь, мирес, гьарадаз вичин кIвал хъсан я. Зун жуван иесидихъ цIигел хьанва. Гехце зи зунжур.
     КицIи зунжур вичин кьилел гьалд хъувуна:
     - Чан жуван кIвал, - лагьана, - зунжурдини эвелан хьиз чуькьуьзмач.
 
АЗИЗРИН Севда

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Кьегьалар рекьидач! Азизан Алем ЧIал хуьнин мураддалди Лезги чIалан тарсар
Статьи из этой рубрики
Гатфар Жив такур гъед Хъсанвилиз писвал Лекьни пехъ Хъалхъас баде
ЦIИЙИ ТИЛИТ
№: 8(324)
сентябрь, 2018

Скачать PDF

РУБРИКИ

ПОЛЕЗНОЕ