Гила гьар гьяддин юкъуз сятдин пудаз Санкт-Петербургда лезги чlалан тарсар кьиле тухузва. И кар шегьердин лезгийрин уьмуьрда кьетIен вакъиадиз элкъвенва. Тарсар гузвайди вичихъ 30 йисан стаж авай муаллим Гуьлишан Сулейманова я. 

     Гуьлишан Лачинан руш 1966-йисан 3-июндиз Дербент райондин Белиждин хуьре дидедиз хьана. Ада юкьван мектеб акьалтlарайдалай гуьгъуьниз Дербентдин педагогикадин училищеда чирвилер къачуна, 1986-йисалай хайи хуьре датIана муаллимвал авуна. Гила лагьайтIа, ада  Санкт-Петербургдин Беринг куьчеда авай 23-нумрадин дараматда гьар гьяддин юкъуз кIватI жезвай лезгийриз ва гьакlни маса миллетрин векилриз лезги чIалан тарсар гузва. Шегьерда яшамиш жезвай лезгийриз дидед чIал, хайи адетар, халкьдин тарих кIанарун патал ада вири жуьредин алахъунар ийизва. Гьавиляй югъ-къандивай тарсара иштиракзавайбурун кьадарни гзаф жезва. 

     Къени къилихрин Гуьлишан Ла­чи­новнадивай рушари, гадайри, гьакIни аялри тарс къачузва. Чна Гуьлишан вахаз, гьакIни и суваб кар кьилиз акъудун патал алахъунар ийизвай Тамерлан Сулеймановаз ва Исагьажи Османоваз сагърай лугьузва, абуруз агалкьунар тIалабзава.

 

«ЛЕЗГИЯР» сайтдай