Фаризат Зейналовадиз  «Дагъустан Республикадин халкьдин артист» гьуьрметдин тIвар ганва лагьай хабар адан сенятдал рикI алайбуру гзаф хушвилелди кьабулна. Вичихъ успагьи акунар, актервилин алакьунар, иер ван, къени къилихар авай и таватдин кьетIенвилерикай сад лезгийрин харусенятдал рикI хьунухь я. Иллаки лезги халкьдин манияр пара кIанда адаз. Абур акьван хъсандиз лугьуда хьи, яб акалзавайбурун пагь атIуда. 

     Фаризат Мегьамедан руш Зейналова  1964-йисан 9-ноябрдиз Докъузпара райондин Мискискарин хуьре дидедиз хьана. Юкьван мектеб акьалтIарна Дербентдин хуьруьн майишатдин техникумдик экечIайлани, техникум куьтягьна Дербентдин консервийрин комбинатда кIвалахал акъвазайлани ада маса мурадрихъ ялзавай. И мурадри эхирни ам 1997-йисуз Лезги театрдиз гъана. Ина Фаризатан вилик яратмишунин рекьер ахъа хьана. 2001-2005-йисара Дербентдин музыкадин училищеда чирвилер къачурдалай кьулухъ ам сенятдив генани рикI алаз эгечIна.

     2005-йисуз «Дагъустан Респуб­ликадин лайихлу артист» гьуьрметдин тIвар къачурла Фаризатахъ луварар акатна. Ам генани шанкьунивди кIвалахиз, яратмишунрин кукIушар рам ийиз алахъна.

     2013-йисуз Дербентдин Харусе­нятдинни Медениятдин ИнститутдинI культурологиядин факультет акьал­тIарайдалай кьулухъ Фаризата Дер­бентдин театрда цIудралди рикIел аламукьдай образар яратмишна. Лезгийрин, Дагъустандин маса халкьарин, урусрин ва дуьньядин драматургрин цIудралди пьесайра кьилин ролар тамамарай ада театрдин нуфуз генани хкажна. Театрдиз атай тамашачияр датIана адан ролари гьейранарзава. И ролар Фаризата иер, верцIи ванцелди лугьузвай манийралди тамамарзава.

     Чна Фаризат Зейналова  «Да­гъустан Республикадин халкьдин артист» гьуьрметдин тIвар къачунай рикIин сидкьидай тебрикзава, адаз мадни чIехи агалкьунар тIалабзава.

 

Гуьлхар ГУЬЛИЕВА